दक्षिण कोरियाली बिटिएस ब्यान्डले मंगलबार अलग-अलग काम गर्ने घोषणा गरेका छन्।
उनीहरूले आफ्नो पहिचान बनाउन छुट्टिएर काम गर्ने निर्णय गरेका हुन्।
बिटिएस ब्यान्डमा आरएम, जिन, भी, जे होप, सुगा, जिमिन, जंगकुक सदस्य छन्। ब्यान्डले नवौं वार्षिकोत्सव मनाउँदै फेस्टा डिनर आयोजना गरेका थिए। उक्त डिनरपछि सुगाले सोलो प्रोजेक्ट गर्न लागेका बताए।
'अब हामी एक नयाँ अन्तरालमा प्रवेश गर्दैछौं,' ब्यान्डका सदस्य सुगाले भने।
‘के-पप र अन्य ब्यान्डको समस्या के हो भने तिनीहरूले तपाईंलाई परिपक्क हुन समय दिँदैनन्। तपाईंले संगीत उत्पादन गरिरहनु पर्छ। म अझै एक्लै काम गरेर हाम्रो समूह प्रवर्द्धनमा सन्तुलन मिलाउन सक्थेँ। तर अहिले म यस बान्डमा काम गर्न सक्दिनँ। यो सम्भव पनि छैन। मैले आफ्नै लागि समय दिनुपर्छ भन्ने महसुस गरेको छु,' ब्यान्डका सदस्य आरएमले भने।
उक्त ब्यान्डका एक सदस्यले सिएनएनसँग भने, ‘हामी छुटिँदैनौँ। केही एकल परियोजना गर्न समय लाग्छ। विभिन्न माध्यमबाट हामी जोडिनेछौँ।’
सन् २०१३ मा बिटिएस ब्यान्ड गठन भएको थियो। उनीहरुले सोमबार नयाँ एल्बम ‘प्रूफ’ निकालेका छन्।
