कार दुर्घटनामा घाइते भएकी अमेरिकी अभिनेत्री एनी हेचेको निधन भएको छ।
क्यालिफोर्नियाको एक अस्पतालले उनलाई कानुनी रुपमा मृत घोषित गरेको छ तर उनको शवलाई भेन्टिलेटरमा राखिएको छ। अंग दानको प्रक्रिया पूरा गर्नका लागि उनको शवलाई यसरी राखिएको बताइएको छ।
बिबिसीका अनुसार लस एन्जलसमा भएको कार दुर्घटनामा परेर उनी घाइते भएकी थिइन्। एउटा घरमा कार ठोक्किएपछि ५३ वर्षीय अभिनेत्री एनी एक सातादेखि कोमामा थिइन्।
'आज हामीले एक उज्यालो प्रकाश, एक दयालु र सबैभन्दा आनन्दित आत्मा गुमायौं,' उनको परिवारले शुक्रबार विज्ञप्ति जारी गर्दै भनेका छन्।
'भोल्कानो, डनी ब्रास्को, साइको' लगायतका फिल्ममा अभिनय गरेकी उनी 'डान्सिङ विथ दी स्टार्स'मा पनि देखिएकी थिइन्। उनी दुई बच्चाकी आमा हुन्।