सन् १९६० को दशकमा अमेरिकन टेलिभिजनमा निकै लोकप्रिय रहेको 'ब्याटम्यान' सिरियलका मुख्य अभिनेता एडम वेस्टको निधन भएको छ। उनको ८८ वर्षको उमेरमा हिजो शुक्रबार राती लस एन्जल्समा निधन भएको हो। उनी पछिल्लो समय ल्यूकेमियाबाट ग्रसित भएको उनको पारिवारीक स्रोतको भनाइ छ।
'ब्याटम्यान' सिरियल सन् १९६६ मा अमेरिकन च्यानल एबीसीमा आउँथ्यो। यहीबाट प्रभावित भएर पछि ब्रुस वेनको मुख्य भूमिकामा 'ब्याटम्यान' का फिल्म श्रंखला बनेका हुन्।
एडम 'ब्याटम्यान' को चरित्रमा यति चर्चित थिए कि उनलाई अन्य भूमिका पाउनै गाह्रो भएको थियो।
सन् १९२८ को सेप्टेम्बर १९ मा जन्मेका वेस्टको अभिनय करियर १९५९ देखि सुरु भएको हो। करिब ७० दशकसम्म अभिनयमा सक्रिय वेस्टको दमदार आवाज धेरै विज्ञापन तथा एनिमेसन फिल्महरुमा सुन्न पाइन्छ। द सिम्पसन्स, फुटुरामा, रग्राट्स, जोनी ब्राभो र ब्याटम्यानः द एनिमेटेड सिरीजमा पनि उनको आवाज छ।
उनकी श्रीमती, छ छोराछोरी, पाँच नातिनातिना र दुई पनातिपनातिना छन्।
