हलिउड गायिका बियोन्सीले जुम्ल्याहा बच्चा जन्माएकी छिन्। अन्तर्राष्ट्रिय सञ्चारमाध्यमका अनुसार बियोन्सीले जन्माएको बच्चा छोरा वा छोरी भन्ने अहिलेसम्म खुलाइएको छैन। उनले गत साता अमेरिकाको एक हस्पिटलमा जुम्ल्याहा बच्चालाई जन्म दिएकी हुन्।
गायिका बियोन्सी र उनको श्रीमान जे जेडले सन् २००८ मा विवाह गरेका थिए। उनीहरूको पाँच वर्षको एक छोरीसमेत छन्। गत फेब्रुअरीमा बियोन्सीले आफू गर्भवती भएको तस्विर सामाजिक सञ्जाल इन्स्टाग्राममा सार्वजनिक गरेकी थिइन्।
बियोन्सीको बुवाले ट्वीटरमा पोस्ट गर्दै जुम्ल्याहा नातीको स्वागत गरेका छन्। उनले ट्वीटरमा बेलुनको तस्वीर हाल्दै लेखेका छन्,‘तिमीहरू यहाँ छौ, जन्मदिनको शुभकामना मेरो जुम्ल्याहा नातीहरू। धेरै माया, तिमीहरुको हजुरबुबा।’
बियोन्सी मनोरञ्जन संसारका १०० धनीको सूचीमा दोस्रो स्थानमा छिन्।
