स्थानीय तहको निर्वाचनमा उम्मेदवार घोषणा गर्नेमा राप्रपा झापामा पहिलो भएको छ।
पार्टीका केन्द्रीय अध्यक्ष राजेन्द्र लिङ्देनको निर्वाचन क्षेत्र भद्रपुर नगरपालिकाको सबै पदमा राप्रपाले उम्मेदवारी घोषणा गरेको हो।
भद्रपुर नगरपालिका नेपाली कांग्रेसका नेता कृष्ण प्रसाद सिटौलाको गृह नगरसमेत हो।
नगरका १० वटा वडाका सवै पद र प्रमुख-उपप्रमुखसहित ५२ वटै निर्वाचित हुने पदमा उम्मेदवार घोषणा गरिएको राप्रपा झापाले जनाएको छ।
‘भद्रपुरले देशका अन्य पालिकालाई पनि उम्मेदवारी घोषणामा उछिनेको छ,’ राप्रपाका झापा जिल्ला अध्यक्ष केशव ओझाले सेतोपाटीसँग भने, ‘भ्रष्टाचार नगर्ने कसम खाएर उम्मेदवार बनेका राप्रपा कार्यकर्ताले पार्टीमा अग्रिम राजीनामा पत्र बुझाए पछि मात्र उम्मेदवारी घोषणा गरिएको हो।’
भद्रपुर-४ को चन्द्र मौलेश्वर शिव पाञ्चायन मन्दिर परिसरमा भएको उम्मेदवार घोषणा कार्यक्रममा अध्यक्ष ओझाले नगर प्रमुखमा नवराज पनेरू ‘राजु’ र उपप्रमुखमा राधा कार्की उम्मेदवार बनेका हुन्।
२०७४ सालको स्थानीय तह निर्वाचनमा पनि राप्रपाको तर्फबाट उनीहरूनै उम्मेदवार बनेका थिए। सो निर्वाचनमा राप्रपा चौथो हुँदै प्रमुखका दावेदार पनेरूले २,८२२ र उपप्रमुखको आकांक्षी कार्कीले ३,२७७ मत प्राप्त गरेका थिए।
राप्रपाले भद्रपुरको एकदेखि १० नम्बर वडासम्म क्रमशः दलबहादुर लिम्बु ‘शंकर’, रामबहादुर राई, हेमवहादुर कार्की, दिनानाथ (शंकर) रिजाल, देवकुमार घिमिरे, ढकवहादुर विष्ट, अभिषेक ढुंगाना, गणेशप्रसाद लिम्बु, ज्ञानबहादुर राई ‘सविन’ र खेमराज भट्टराईलाई वडाध्यक्षको प्रत्यासीमा चयन गरेको छ।
