बुटवल उपमहानगरपालिकाको मेयरका लागि नेपाली कांग्रेस नगर समितिले नगर सभापति खेलराज पाण्डेको एकल नाम सिफारिस गरेपछि कांग्रेसभित्र विवाद उत्पन्न भएको छ।
सत्तारूढ गठबन्धनको भागबन्डामा बुटवलको मेयर पाएको नेपाली कांग्रेसभित्र पाण्डेसहित क्षेत्र नम्बर २ का सभापति हरि लम्साल र चुन्नप्रसाद पौडेलसमेत आकांक्षी थिए।
नगर समितिको सोमबार बसेको बैठकले लम्साल र पौडेलको विषयमा कुनै छलफल समेत नगरी पाण्डेको नाममात्रै सिफारिस गरेको भन्दै लम्साल र पौडेलको समूहले पार्टीको लुम्बिनी प्रदेश कार्यालयमा निवेदन दर्ता गराएका छन्।
क्षेत्रीय सभापति लम्सालको नेतृत्वमा प्रदेश २ क का सभापति पर्शुराम ढकाल र ख का सभापति खड्कबहादुर महतलगायत १७ जनाले प्रदेश कार्यालयमा पाण्डेले एकलौटी रूपमा आफ्नै नाममात्र सिफारिस गरेको भन्दै निवेदन दिएका हुन्।
बुटवलको नगर प्रमुखका आकांक्षी रहेका लम्सालले नगर समितिले विधानविपरीत र प्रक्रिया नपुर्याई एकपक्षीय रूपमा उम्मेदवारको नाम सिफारिस गरेपछि आफ्नो नेतृत्वमा निवेदन दर्ता गराएको बताए।
‘नगर समितिले नगर प्रमुखको उम्मेदवारमा सिफारिस गरेको प्रक्रियासमेत विधानविपरीत छ, नगर समितिभन्दा माथिल्लो तहमा रहेकाहरूलाई बैठकमा नबोलाई र कुनै पनि आकांक्षीलाई छलफलमा सहभागी नगराई एकल नाम सिफारिस गरिएको छ, यसमा हाम्रो सहमति छैन,’ लम्सालले भने।
नगर सभापति पाण्डे र क्षेत्रीय सभापति लम्साल पार्टीभित्र समेत एउटै समूह संस्थापनइतर समूहका मानिन्छन्। नगर समितिले नगर सभापति रहेका पाण्डेयको एकल नाम सिफारिस गरेपछि असन्तुष्टि जनाएका लम्सालले विधानविपरीत नाम सिफारिस गरिएकाले त्यसलाई बदर गर्न माग गरिएको बताए।
‘अहिले हामीहरू पार्टीको प्रदेश कार्यालयमा छौं, जसरी नगर प्रमुखमा एक जनाको मात्र नाम सिफारिस गरिएको छ, यो विधानविपरीत भएकाले हामीहरूलाई मान्य छैन,’ उनले भने।
