नेकपा (एकीकृत समाजवादी) ले घरेलु पेय पदार्थलाई अन्तर्राष्ट्रिय बजारमा ब्रान्डिङ गर्ने प्रतिवद्धता जनाएको छ।
वैशाख ३० हुने स्थानीय चुनावका लागि एकीकृत समाजवादीले जारी गरेको घोषणापत्रमा जाँड तथा छ्याङलाई व्यवस्थित तरिकाले उत्पादन गरी अन्तर्राष्ट्रिय बजारमा पुर्याउन आवश्यक रहेको उल्लेख छ।
‘आफ्ना उत्पादनलाई धरासायी बनाउने र सोही काममा प्रयोग हुने विदेशी वस्तु आयात गरी देशको अर्थतन्त्रलाई परनिर्भर बनाउने प्रवृत्ति घातक छ,’ मंगलबार सार्वजनिक भएको घोषणापत्रमा भनिएको छ,‘संघ र प्रदेश सरकारसँग आवश्यक तालमेल गरी नेपाली ब्रान्डिङ गरी बजारीकरण गर्ने कुरालाई पालिकाहरूले योजनावद्ध ढंगले अगाडि बढाउने छन्।’
एकीकृत समाजवादीले निःशुल्क खानेपानीको सुविधा उपलब्ध गराउने प्रतिवद्धता जनाएको छ। त्यसका लागि उसले स्वच्छ खानेपानीको सुविधा पुगेका पालिकाका हरेक घरपरिवारलाई मासिक पाँच हजार लिटर निःशुल्क उपलब्ध गराउन भनेको छ।
विद्युत सेवा नपुगेका हरेक घरमा आधारभुत विद्युत सेवा पुर्याउने र हरेक परिवारमा २०० युनिटसम्म विद्युत महसुलमा छुट दिने घोषणापत्रमा उल्लेख छ।
भूमिहीन सुकुम्बासी समस्या समाधान गर्ने, भ्रष्टाचारमुक्त स्थानीय सरकार, मदिरा सेवन कार्डको व्यवस्था, कब्जा गरिएका सार्वजनिक जमिन र सम्पत्तिहरूको खोजीलगायत काम गर्ने प्रतिवद्धता पनि समाजवादीले घोषणापत्रमा जनाएको छ।
