जनकपुरधाम उपमहानगरपालिकाका मेयर जनता समाजवादी पार्टी (जसपा) ले पाउने भनी केन्द्रीय गठबन्धनले गरेको निर्णय नमान्ने कांग्रेस नगर सभापति मनोज साहले चेतावनी दिएका छन्।
सत्तारूढ पाँच दलबीच जनकपुरधामको नेतृत्व जसपालाई दिने निर्णय घोर आपत्तिजनक रहेको उनको ठहर छ।
‘मधेसमा नेपाली कांग्रेसलाई समाप्त पार्ने यो रणनीति हो। वीरगञ्ज महानगरको मेयर पनि छोडिदियो, जनकपुरको पनि छोडिदियो। हामी यसको घोर निन्दा गर्छौं,’ उनले भने,‘केन्द्रले अबिलम्ब निर्णय सच्याउनु पर्छ। निर्णय सच्याएन भने केन्द्रीय नेताहरूसँग भोलि छलफल गरेर कठोर निर्णय गर्छौं।’
जसपाका हालका मेयरले करोडौं भ्रष्टाचार गरेको आरोप लगाउँदै उनले फेरि त्यही व्यक्तिलाई भोट दिन नसकिने उनको भनाइ छ। जसपाले फेरि मेयरमा लालकिशोर साहलाई नै दोहोर्याउने तयारी गरिरहेको छ।
धनुषा जिल्ला कांग्रेस सभापतिले समेत केन्द्रीय गठबन्धनले गरेको यो निर्णयप्रति असन्तुष्टि जनाएका छन्।
‘नगर कार्यसमिति एकदमै आक्रोशित छन्। हामीले माथि पनि कुरा गर्दैछौं। जनकपुर कांग्रेसले जित्ने अवस्थामा थियो त्यसैले सोचेर मात्र गठबन्धन गर्नुपथ्र्यो तर केन्द्रको निर्णय मान्नैपर्छ,’ उनले भने।
