टीकापुर हत्याकाण्डमा दोषी ठहर कैद सजाय भोगिरहेका रेशम चौधरीले खोलेको नयाँ दलले स्थानीय चुनावमा प्रतिष्पर्धा गर्ने भएको छ।
जेल जीवन बिताइरहेका चौधरीले गत वर्ष जनता समाजवादी पार्टी त्यागेर नयाँ पार्टी खोलका थिए। उनी आफू अध्यक्ष बन्न नमिल्ने भएपछि उनकी श्रीमती रञ्जिता श्रेष्ठ नागरिक उन्मुक्ति पार्टीकी प्रमुख छन्।
उक्त पार्टीले अहिले वैशाख ३० गते हुने स्थानीय चुनावको प्रचारप्रसार गरिरहेको छ। कैलालीसहित अन्य केही जिल्लामा स्थानीय तहको निर्वाचनका लागि विभिन्न पदमा उम्मेदवारी दिने पार्टीको तयारी छ।
कैलालीका १३ वटै स्थानीय तहमा उम्मेदवार टुंगो सर्टलिस्ट जिल्ला समितिमा पुगेको छ। वैशाख १० गते अन्तिम सूची सार्वजनिक गरिने पार्टीका संस्थापक केन्द्रीय सदस्य गंगा चौधरीले बताए।
नागरिक उन्मुक्ती पार्टीले टीकापुरको मेयरमा रामलाल चौधरी र उपमेयरमा उल्कादेवी बिकको नाम सिफारिस गरेको छ। जानकी गाउँपालिकाको अध्यक्षमा पत्रकार गणेश चौधरी र उपाध्यक्षमा लालमती चौधरीको नाम सिफारिस भएको छ।
भजनी नगरपालिकाको मेयरमा केवल चौधरीको नाम सिफारिस भएको छ भने उपमेयरको टुंगो लागिसकेको छैन।
जोशीपुर गाउँपालिकामा अध्यक्षका लागि आकांक्षी चित्रबहादुर चौधरी र चक्र चौधरी छन्। यस्तै रेखा कठरियाको नाम उपाध्यक्षमा अघि सारिएको छ।
लम्कीचुहा नगरपालिकाको मेयरका लागि महेन्द्र उपाध्यायको नाम सिफारिस भएको छ भने उपमेयरको नाम टुंगो लगाउन बाँकी रहेको चौधरीले बताए।
धनगढी उपमहानगरपालिकाको मेयरका लागि निमराज चौधरी र उपमेयरमा सावित्री चौधरीको नाम अघि सारिएको छ।
चुरे र मोहन्यालमा पनि उम्मेद्वार उठाउने सो पार्टीको तयारी छ। घोडाघोडीको मेयरमा प्रेम चौधरी नाम सिफारिस भएको छ भने उपमेयर टुंगो लाग्न बाँकी छ।
गौरीगंगा, बर्दगोरिया र कैलारीमा उम्मेदवारको टुंगो लागिसकेको छैन।
पार्टीको हेडक्वार्टरबाट लिखित सूचना जारी गर्दै नागरिक उन्मुक्ति पार्टीका अध्यक्ष रञ्जिता श्रेष्ठ चौधरीले अन्य कसै पार्टीसँग स्थानीय चुनावमा तालमेल नहुने जनाएकी छन्। केन्द्रीय सदस्य चौधरीले पनि अहिले पार्टीले कसैसँग पनि गठबन्धन नगर्ने बताए।
‘गठबन्धनवाला हामीसँग डराएका छन्, कैलालीका १३ स्थानीय तहमा कम्तीमा ७ मा जित्छौं भन्ने छ,’ उनले भने।
२०७४ को प्रतिनिधि सभा निर्वाचनमा ३४ हजार ३ सय ४१ मत ल्याएर कैलाली क्षेत्र १ मा जनता समाजवादी पार्टीबाट रेशम चौधरीले जितेका थिए। उनकी निकटतम् प्रतिद्वन्द्वी त्यतिबेला एमालेकी उम्मेद्वार रहेकी मदनकुमारी शाहले १३ हजार ४ सय ६ मत पाएकी थिइन्।
चौधरीमाथि २०७२ भदौ ७ गते भएको टीकापुर हत्याकाण्डको योजनाकार भएको आरोप लागेपछि त्यसबेला फरार थिए। उनले फरार नै रहेका बेला संसदीयमा चुनाव जिते।
सांसदको सपथ लिन उनले २०७४ फागुन १४ गते अदालतसमक्ष आत्मसपर्मण गरे। अदालतले उनलाई दोषी ठहर गरेपछि अहिले जेलमा छन्।
नागरिक उन्मुक्ति पार्टीले टीकापुरसहित केही स्थानीय तहमा जित्ने दाबी गरेको छ। केन्द्रीय सदस्य चौधरीले जितको आधार पार्टीको एजेन्डा रहेको बताए।
‘हामीले समान न्याय चाहिन्छ भन्ने हो, कसैलाई काखा कसैलाई पाखा गर्न नपाइने भन्ने एजेन्डा छ,’ उनले भने।
अहिले सो पार्टीले संगठन निर्माण गरिरहेको छ। ४५ जिल्लामा संगठन बनेको र नवलपरासीदेखि पश्चिम तराईका जिल्लामा जितका आधार राम्रो ठानेको चौधरीले बताए।
‘टीकापुरको घटना र थारू बाहुल्यता भएकाले जनजातिको मात्रै उपस्थिति बढी होला भनिन्छ तर त्यसो होइन, हामी समावेशी छौं,’ उनले भने।
यो चुनावलाई परीक्षा र अवसरका लागि नागरिक उन्मुक्ति पार्टीले हेरेको उनले बताए। केही स्थानीय तह मात्रै जिते पनि केन्द्रसम्म पार्टीले प्रभाव राख्न सक्ने चौधरीको भनाइ छ।
अहिले रेशम चौधरीसँग गठबन्धन गरौं भनेर विभिन्न दलका नेता पुग्ने गरेका चौधरीले बताए।
‘तर हाम्रो पहिचान माग र मुद्दा फरक भएकाले कसैसँग तालमेल गर्दैनौं,’ उनले भने।
