निर्वाचन आयोगले आजदेखि चुनावलाई आवश्यक पर्ने सामग्री ढुवानी गरी पठाउन थालेको छ।
निर्वाचनलाई आवश्यक पर्ने सामग्री आजदेखि ढुवानी गरी पठाउन थालिएको प्रवक्ता तथा सहसचिव शालिग्राम शर्मा पौडेलले जानकारी दिए।
‘आयोगले आजैदेखि जिल्लामा निर्वाचन सामग्री पठाउन सुरू गरेको छ,’ उनले पत्रकार सम्मेलनमा भने।
आज मुगु, बाजुरा, अछाम, जाजरकोट, ताप्लेजुङ, सोलुखुम्बु र काठमाडौंका लागि आवश्यक पर्ने निर्वाचन सामग्री पठाउन थालेको उनले बताए।
निर्वाचन सामग्री जिल्लामा पुर्याउन छुट्टाछुट्टै प्रदेशमा छुट्टाछुट्टै ढुवानी व्यवसायीहरूलाई छनोट गरेको आयोगले जनाएको छ।
‘हामीले छुट्टाछुट्टै प्रदेशमा ढुवनी व्यवसायीहरूलाई छनोट गरेका थियौं। उहाँहरूले स्वीकारेको दरमा ढुवानी गर्नुहुन्छ,’ पौडेलले भने।
यस्तै, आजसम्म ५३ जिल्लाको एक करोड १९ लाख मतपत्रको छपाइ भइसकेको आयोग प्रवक्ता पौडेलले बताए।
आयोगले एक करोड ८४ लाख मतपत्रको छपाइ गर्न जनक शिक्षा केन्द्रलाई दिएको छ।
छापिइसकेको मतपत्र भने आयोगले पठाएको छैन। मतपत्र वैशाख १४ वा १५ गते पछिमात्रै पठाउने आयोगको तयारी छ।
छिटो पठाउँदा सुरक्षामा संवेदनशीलताको कुरा भएको भन्दै आयोगले पछिमात्रै पठाउने तयारी गरेको हो।
मतपत्र जिल्लाहरूमा पठाउँदा सुरक्षाको लागि सेना खटिने आयोगले जनाएको छ।
‘मतपत्रको संवेदनशीलतालाई मध्यनजरमा राखेर मतपत्रको नेपाली सेनाले नै ब्याकअप गरेको हुन्छ,’ उनले भने, ‘अन्य सामानको हकमा गृह मन्त्रालयले आ-आफ्नो युनिटहरूलाई पत्राचार गरेको हुन्छ। गाडी चालकको नम्बर लिइएको हुन्छ। साथमा आयोगका कर्मचारी पनि रहन्छ। जिपिएस ट्र्याकिङ गरिएको हुन्छ। कहाँ पुग्यो त्यसबाट हेर्छौं।’
मतपत्र पनि अधिकांश जिल्लामा गाडीबाटै पठाउने तयारी रहेको उनले बताए। यद्यपि सडक विभागसँग समन्वय गर्दा दुई जिल्लामा हवाई माध्यमबाट पठाउने तयारी गरेको छ।
डोल्पा र मुगुमा गाडी जान सम्भव नभएको हुँदा हवाई माध्यमबाट पठाउन लागिएको हो।
