नेकपा एमालेले वैशाख १० गते महानगरपालिका र उपमहानगरपालिकाको उम्मेदवारको टुंगो लगाउने भएको छ।
एमाले अध्यक्ष केपी शर्मा ओलीको निवास बालकोटमा बसेको सचिवालय बैठकले अहिलेसम्म आएका नामहरूको बारेमा छलफल गरेको थियो।
तीन महानगरको प्रमुखमा एक जनाको मात्रै नाम आएको र अन्य महानगरपालिका र उपमहानगरपालिकाको उम्मेदवारको १० गते टुंगो लगाउने एमाले उपमहासचिव पृथ्वीसुब्बा गुरूङले बताए।
एमालेले स्थानीय तह निर्वाचनको लागि वैशाख १० गते घोषणापत्र सार्वजनिक गर्ने समेत निर्णय गरेको छ।
एमालेले भरतपुरबाहेक अन्य स्थानीय तहमा प्रदेश सांसदलाई उठ्न नदिइने निर्णय गरेको छ।
'गण्डकी, लुम्बिनीमा अझै पनि सरकार परिवर्तनको सम्भावना रहन्छ। त्यसैले त्यहाँका सांसदहरूलाई स्थानीय तहमा उम्मेदवार बन्न नदिने निर्णय भएको छ,'गुरूङले भने,'भरतपुरको मेयर उम्मेदवार बनेका विजय सुवेदीको हकमा भने यो लागू हुँदैन। किनकि बागमतीमा हाम्रो नेतृत्वमा सरकार बन्ने सम्भावना रहँदैन।'
उपमहासचिव गुरूङले महानगरपालिका र उपमहानगरपालिकामा अन्य दलसँग तालमेलको सम्भावना रहेको बताए।
उनले लोसपा, जसपा लगायतका दलहरूसँग समेत स्थानीय तहमा तालमेलको सम्भावना रहेको बताए।
त्यस्तै, नेपाली कांग्रेस र नेकपा माओवादी केन्द्रसँग समेत ठाउँ हेरेर तालमेल हुनसक्ने उनको दाबी छ।
