नेकपा एकीकृत समाजवादीले तुलसीपुर उपमहानगरपालिकाको उपमेयरको उम्मेदवार जिल्ला इञ्चार्ज तथा केन्द्रीय सदस्य जोगबहादुर रानालाई बनाउने भएको छ।
पाँच दलीय गठबन्धनका बीचमा भएको सहमति अनुसार दाङको तुलसीपुरमा मेयर नेपाली कांग्रेसको भागमा र उपमेयर समाजवादीको भागमा परेको थियो।
राना समाजवादीमा आउनुपूर्व नेकपा एमाले दाङ जिल्ला कमिटीका उपाध्यक्ष तथा कार्यवाहक अध्यक्षको जिम्मेवारी निर्वाह गरिसकेका नेता पनि हुन्।
एकीकृत समाजवादीबाट उपमेयरका लागि यसअघिका जिल्ला खेलकुद विकास समितिका अध्यक्ष डिल्ली डाँगी र तुलसीपुर कार्यपालिका सदस्य जानका रेग्मीको नाम पनि सिफारिस भएको थियो।
टुंगो लागिनसकेको भए पनि पछिल्लो समय नेपाली कांग्रेसका केन्द्रीय सदस्य तथा पूर्वसांसद गेहेन्द्र गिरीको नाम मेयरको रूपमा सबभन्दा बढी चर्चामा छ। गिरी २०७४ सालको स्थानीय तह निर्वाचनमा पनि मेयरमा पराजित भएका थिए।
तुलसीपुर नगर समितिले भने १९ जनाको नाम सिफारिस गरेर जिल्लामा पठाएको थियो।
