गठबन्धनबीच सहमति नजुटेपछि उदयपुरका दुइटा नगरपालिकाको मेयर पदका लागि नेपाली कांग्रेसले छुट्टै उम्मेदवारी दिने निर्णय गरेको छ।
शुक्रबार बसेको गठबन्धनको बैठकले जिल्लाको चौदण्डीगढी नगरपालिका र त्रियुगा नगरपालिकामा कांग्रेसले छुट्टै उम्मेदवार र बाँकी चार दलले साझा उम्मेदवार उठाउने सहमति जुटेको हो।
बैठकमा सहभागी माओवादीका अध्यक्ष विनोद कटुवालले सेतोपाटीसँग भने, 'चौदण्डीगढीमा कांग्रेस छुट्टै लड्ने कुरालाई अनुमोदन गरियो। बाँकी पालिकाहरूमा भने सहमति भएन।'
त्रियुगा नगरपालिकाको हकमा भने हिजै बसेको बैठकमा सहमति जुटेको थियो। त्रियुगामा पनि कांग्रेसले छुट्टै र चार दलले साझा उम्मेदारी दिने भनिएको छ।
उदयपुरमा चार नगरपालिका र चार गाउँपालिका गरी आठ वटा स्थानीय तह छन्। बाँकी ६ वटा स्थानीय तहको हकमा भने सहमति जुट्न सकेको छैन।
छलफलमा सहभागी एक नेताले माओवादीले चारमध्ये एउटा नगरपालिकामा दाबी गरेको तर कांग्रेसले दिन नमानेका कारण सहमति जुट्न नसकेको जनाए।
'हामीले एउटा नगरपालिका दाबी गरिरहेका छौं तर कांग्रेस छोड्ने अवस्थामा छैन। हामी पनि छोड्ने पक्षमा छैनौं। यसले गर्दा नै रोकिएको हो,' ती नेताले भने।
उनले बाँकी रहेका पालिकाहरूको भागबन्डा टुंग्याउन भोलि फेरि गठबन्धनको बैठक बस्ने जनाए।
