मेयरमा चुनाव लड्न मन्त्रीसहित मधेस प्रदेशका दुई जना प्रदेशसभा सदस्यले राजीनामा दिएका छन्।
सरकारका कानुन, न्याय तथा प्रदेशसभा मामिलामन्त्री प्रमोद यादव र शेख अबुल कलाम आजादले राजीनामा बुझाइसकेको प्रदेशसभा सचिवालयले जनाएको छ।
दुबै जनाले आजै प्रदेशसभामा राजीनामा दिएको प्रदेशसभाका निमित्त सचिव रंजित यादवले जानकारी दिए।
तत्कालीन नेकपा एमालेबाट मन्त्री यादव सिरहा निर्वाचन क्षेत्र नम्बर ३ को (ख) बाट निर्वाचित भएका थिए भने स्वतन्त्रबाट आजाद रौतहट निर्वाचन क्षेत्र नम्बर ४ ‘ख’ बाट विजयी भएका थिए।
मन्त्री पदबाट समेत राजीनामा दिन कागजी प्रक्रिया पूरा गरिरहेको मन्त्री यादवले बताए। उनी सिरहा नगरपालिकाको मेयरमा उठ्ने तयारीमा छन्। नेकपा एकीकृत समाजवादी पार्टीबाट उनी मेयरका लागि सिफारिस भएका हुन्।
नगरपालिकामा कुनै दलबीच तालमेलको सम्भावना नरहेकाले एक्लै चुनाव लड्न लागेको उनले बताए।
त्यसैगरी सांसद अजाद स्वतन्त्र निर्वाचित भए पनिपछि जनता समाजवादी पार्टी (जसपा) नेपालमा प्रवेश गरेका थिए। उनी गढीमाई नगरपालिकाबाट मेयर उठ्ने तयारीमा छन्। जसपाले उनलाई मेयरका लागि सिफारिस गरेको छ।
गढीमाई नगरपालिकामा समेत गठबन्धन गर्ने प्रयास जारी रहे पनि हालसम्म हुन सकेको छैन।
धनुषा निर्वाचन क्षेत्र नम्बर ३ को (ख) बाट निर्वाचित प्रदेशसभा सदस्य परमेश्वर साह पनि लोकतान्त्रिक समाजवादी पार्टी (लोसपा) बाट जनकपुरधाम उपमहानगरपालिकाबाट टिकटका लागि प्रयास गरिरहेका छन्। पार्टीले टिकट निश्चित गरेपछि आफूले पनि राजीनामा दिने उनले बताए।
