निर्वाचन आयोगले वैशाख ११ र १२ गते मनोनयनपत्र दर्ता गर्न जाँदा आचारसंहिताको पालना गर्न अपिल गरेको छ।
शनिबार आयोगमा आयोजित विशेष पत्रकार सम्मलेनमा आयोग प्रवक्ता तथा सहसचिव शालिग्राम शर्मा पौडेलले मनोनयन पत्र दर्ता गर्न जाँदा निर्वाचन आचारसंहिताले तोकेबमोजिमको आचरण पालना गर्न अपिल गरेका हुन्।
यस्तै, आचारसंहिताविपरीत कार्य भएको पाइएमा कानुनबमोजिम कारबाही गर्ने चेतावनी समेत दिए।
‘यदि आचारसंहिताविपरीत कार्यहरु भए गरेको पाइएमा आयोगले कानूनबमोजिम कारबाही हुने र यसबाट उम्मेदवारको उम्मेदवारी प्रक्रियामा नै गम्भीर असर पर्न सक्ने हुँदा समयमा नै सचेत रहन उम्मेदवार हुन चाहने सबै मतदाताहरूमा जानकारी गराइएको छ,’ उनले भने।
यस्तै, उनले राजीनितिक दलहरूकै सुझावमा मनोनयन दिन दुई दिनको समय राखेको बताए।
स्थानीय तह निर्वाचन, २०७४ मा काठमाडौं महानगरपालिकामा जम्मा ८६०, विराटनगर महानगरपालिकामा ७०३ र वीरगंज महानगरपालिकामा ११२५ जनाको मनोनयनपत्र दर्ता भएको थियो।
त्यस्तै, अन्य निर्वाचन कार्यालयमा समेत मनोनयनपत्र दर्ता गर्ने कार्यचाप अत्यधिक रहेकोले मनोनयनपत्र दर्ता गर्ने काम सम्पन्न नभई भोलिपल्टसम्म गर्नुपरेको उनले बताए।
जसकारण उम्मेदवारको सूची प्रकाशन गर्ने काममा अवरूद्ध भएको अनुभव र राजनीतिक दल तथा सरोकारवालाहरूको सुझावलाई लिएर आयोगले दुई दिनको समय तोकेको बताए।
‘वैशाख ११ र १२ गते तोकिएको समय १० बजदेखि साँझ ५ बजेभित्र कानूनबमोजिम स्थानीय तह सदस्यको निर्वाचनमा उम्मेदवार बन्न योग्यता पुगेको कुनै पनि व्यक्तिले कुनै पनि समयमा सम्बन्धित निर्वाचन अधिकृतको कार्यालयमा तोकिए बमोजिमको प्रक्रिया पूरा गरी उम्मेदवारको मनोनयन दर्ता गर्न सक्नेछ,’ उनले भने।
आयोगले वैशाख १२ गते नै मनोनयनपत्र दर्ता भएको उम्मेदवारको सूची प्रकाशन गर्ने तयारी गरेको छ।
वैशाख १३ गते उम्मेदवारको विरोधमा उजुरी दिने, वैशाख १४ र १५ गते मनोनयनपत्र जाँच गर्ने तथा उजुरी उपर जाँचबुझ गरी निर्णय गर्ने र वैशाख १५ गते मनोनयन भएको उम्मेदवारको नामावली प्रकाशन गर्ने तयारी गरेको छ।
यस्तै वैशाख १६ गते उम्मेदवारले नाम फिर्ता लिने र उम्मेदवारको अन्तिम नामावली प्रकाशन गर्ने तथा वैशाख १७ गते उम्मेदवारलाई निर्वाचन चिन्ह प्रदान गर्ने कार्यक्रम आयोगको छ।
यी सबै कार्यक्रम सम्बन्धित निर्वाचन अधिकृतको कार्यालयमा हुने आयोगले जनाएको छ।
