पूर्वप्रधानमन्त्री एवम् नेकपा एमालेका अध्यक्ष केपी शर्मा ओलीको गृहनगर रहेको झापाको दमक नगरपालिकाको मतपरिणाम रोचक मोडमा पुगेको छ।
भर्खरै ओलीको घर रहेको वडा नम्बर ५ को मतगणना सकिँदा मेयरमा राष्ट्रिय प्रजातन्त्र पार्टी (राप्रपा) का राम थापाको अग्रता कायम छ।
धेरैले ओलीको वडाबाट एमालेले अग्रता दिलाउने अपेक्षा गरेको भए पनि अहिले पनि राप्रपाका थापाले एमालेकी मेयर उम्मेदवार गीताकुमारी पौडेल अधिकारीभन्दा ४०३ मतले अग्रता लिएका छन्।
धेरैले ५ नम्बर वडालाई एमालेको गढ माने पनि यो वडाबाट एमालेले राप्रपाको ८७० को मतान्तरलाई उल्टाउन सकेन।
५ नम्बर वडाबाट एमालेका मेयरले २१२४ मत प्राप्त गरेकी छिन्। यस्तै राप्रपाले १६५७ मत पाएको छ।
अहिलेसम्म राप्रपाका थापाले १६२२७ र एमालेकी गीताकुमारीले १५८२४ मत पाएकी छन्।
तर एमालेकी मेयरले यो वडामा वडाध्यक्षले जति मत पाएकी छैनन्। एमालेका निर्वाचित वडाध्यक्षले २४२६ मत पाएका छन्। यो भनेको मेयरले पाएको भन्दा ३०२ मतले बढी हो।
यदि वडाध्यक्षले पाएको मत बराबर मेयरले पनि पाएको भए एमालेले राप्रपासँगको मतान्तर १०१ मा झार्ने थियो।
कुल १० वडामध्ये दमकमा वडा नम्बर ६ को मत गन्न बाँकी छ। यो वडामा २७५४ मत खसेको छ।
६ नम्बर वडामा गठबन्धन र एमालेको अवस्था बराबरी रहेको एमाले नेतहरू बताउँछन्। त्यसैले ओलीकै ५ नम्बर वडाले एमालेलाई जिताउनेमा उनीहरू आशावादी थिए। तर ५ नम्बर वडाको मतगणना सकिँदा पनि राप्रपाको अग्रता कायम रहँदा परिस्थिति थप रोचक बनेको छ।
गठबन्धनका नेताहरूको भने ५ नम्बर वडामा अग्रता जोगाउन सके जित आफ्नो पक्षमा हुने विश्लेषण छ।
‘वडा नम्बर सातको नतिजा आउँदा हामी साढे चारदेखि पाँच सय मतको अग्रतामा हुन्छौ,’ कांग्रेस झापा ५ का क्षेत्रीय सभापति दुण्डीराज भण्डारीले भने, ‘तर ६ मा बराबरी अवस्था रहेका कारण हामीले चुनाव जित्ने निश्चित छ।’
उपमेयरमा पनि कांग्रेसकै रेगिना भट्टराईकै अग्रता छ। उनी १५७२९ मतसहित एमालेकी अम्वीकाप्रसाद खनालभन्दा अघि छिन्। खनालले भने १५५३२ मत ल्याएका छन्।
यसपालि दमकमा छ दलीय गठबन्धनबाट राप्रपाका राम थापा मेयरका साझा उम्मेदवार छन्। त्यसैले पनि सुरुदेखि नै दमकमा गठबन्धन र एमालेबीच कडा टक्कर रहँदै आएको छ।
