जिएसएम पोस्टपेड मोबाइलको बिलिङ प्रणालीका सम्बन्धमा नेपाल टेलिकमले थप स्पष्ट पारेको छ।
पोस्टपेड मोबाइल प्रयोगकर्ताले प्रत्येक महिना न्यूनतम ३ सय ८३ रुपैयाँ ७ पैसा रेन्टल शुल्क तिर्नुपर्दछ। यसको अर्थ ग्राहकले यो भन्दा थोरै रकमको सुविधा प्रयोग गरे पनि रेन्टलवापत ३ सय ८३ रुपैयाँ ७ पैसा तिर्नुपर्छ।
यद्यपि कम्पनीले उपलब्ध गराएको कर्पोरेट युजर ग्रुप (सियूजी) अफर वा अन्य विशेष पोस्टपेड अफर लिएका ग्राहकको हकमा भने यो रकम फरक हुनसक्छ।
‘पोस्टपेड मोबाइल प्रयोगकर्ताहरुले धेरै सुविधा उपयोग गर्ने भएकाले यो व्यवस्था पहिलेदेखि नै गरिएको हो, जुन अहिले पनि कायम छ’ टेलिकमले भनेको छ ‘यही रेन्टल चार्ज वापतको रकम पोस्टपेड प्याक खरिद गर्न, कुनैपनि प्याक खरिद नगरी फोन गर्न, एसएमएस गर्न वा डाटा चलाउन पाइन्छ।’
पछिल्लो समयमा नेपाल टेलिकमले उपलब्ध गराइरहेका विभिन्न प्याकका प्रयोगकर्ताको संख्या वृद्धि भइरहेको छ। ग्राहकले प्याक प्रयोग गर्दा यो रेन्टल चार्ज भन्दा छुट्टै रकम काटिन्छ।
सस्तो दरका डाटा र भ्वाइस प्याक उपलब्ध भएकाले ग्राहकले यो रेन्टल चार्ज वापतको रकममा खासै ध्यान नदिएको टेलिकमले जनाएको छ।
सामान्यतः नेपाली महिनाको अन्त्य अर्थात् अंग्रेजी महिनाको १५ तारिखमा पोस्टपेड मोबाइलको बिल हिसाब गरिन्छ। यो अवस्थामा महिनामा थोरै मात्र रकम प्रयोग गरेको भएपनि ३ सय ८३ रुपैयाँ ७ पैसा जोडेर त्यो महिनाको हिसाब गरिन्छ।
मानौं, कुनै ग्राहकले महिनामा १ सय रुपैयाँ मात्र प्रयोग गरेको भए पनि ३ सय ८३ रुपैयाँ ७ पैसा नै काटिन्छ। आफ्नो २ सय ८३ रुपैयाँ ७ पैसा कता हरायो भनी झुक्किएको पाइन्छ।
कम्पनीको जिएसएम पोस्टपेड सेवामा विगत लामो समयदेखि यसरी नै बिलिङ हुने भएतापनि हाल सस्तो दरका प्याकहरु उपलब्ध भएपश्चात् धेरै ग्राहक झुक्किने गरेको कम्पनीको भनाइ छ।
उदाहरणका लागि, कुनै पोस्टपेड मोबाइल प्रयोगकर्ताले २ सय रुपैयाँको प्याक प्रयोग गरेको छ भने प्याक वापतको २ सय रुपैयाँ र रेन्टल चार्ज वापतको ३ सय ८३ रुपैयाँ ७ पैसा गरी ५ सय ८३ रुपैयाँ ७ पैसा तिर्नुपर्छ।
मानौ, १४ तारिखका दिन ग्राहकको मोबाइलमा बाँकी रकम ४ सय रुपैयाँ थियो भने सो रकम समेत काटिएर थप १ सय ८३ रुपैयाँ ७ पैसा समेत तिर्नुपर्ने हुन्छ।
पोस्टपेड ग्राहकको यही अन्यौललाई सम्बोधन गर्नका लागि कम्पनीले हाल ‘पोस्टपेड प्याक’ उपलब्ध गराइरहेको छ। पोस्टपेड प्याक लिँदा ग्राहकले रेन्टल चार्जवापतको रकम पनि प्याक खरिदमा उपयोग गर्नसक्ने भएकाले ग्राहक झुक्किने सम्भावना हुँदैन।
सो प्याक प्रयोग गरी कम्पनीको नेटवर्क भित्र र बाहिर कल गर्न, एसएमएस पठाउन र डाटा चलाउन सकिन्छ। पोस्टपेड प्याक लिनका लागि आफ्नो पोस्टपेड मोबाइलबाटै *1415*2# डायल गरी आफूलाई उपयुक्त प्याक खरिद गर्न सकिन्छ।
यसैगरी पोस्टपेड मोबाइल बिलको जानकारी लिनका लागि *400# डायल गर्न सकिन्छ। सेवा प्रयोग गरेवापत ग्राहकले कम्पनीलाई बुझाउन बाँकी रकमलाई ड्यू अमाउन्ट भनिन्छ।
अभाइलेबल क्रेडिट भनेको अब ग्राहकले प्रयोग गर्न पाउने रकम हो। साथै सोही बिल कम्पनीको वेबसाइटमार्फत र कम्पनीको एप ‘नेपाल टेलिकम’ बाट पनि हेर्न सकिन्छ। कम्पनीको एपबाट पनि आफूले प्रयोग गरेको पछिल्लो ५ दिनसम्मको सबै बिलको रेकर्ड युसेज हिस्ट्रीमार्फत हेर्न सकिन्छ।
नेपाल टेलिकमले उपलब्ध गराइरहेको पोस्टपेड मोबाइलमार्फत गरिने कलको दर प्रिपेडको तुलनामा सस्तो हुनुका साथै रेण्टल चार्ज समेत उपयोग गर्न सकिने गरी पोस्टपेड प्याक उपलब्ध भएकाले कम्पनीको जिएसएम पोस्टपेड सेवा थप आकर्षक हुने कम्पनीको दावी छ।
