साओमीले आफ्नो नयाँ स्मार्टफोन साओमी १२ का सिरिज यही महिना सार्वजनिक गर्ने भएको छ।
ग्याजेट ३६०का अनुसार कम्पनीको यो सिरिजमा पर्ने तीन स्मार्टफोन साओमी १२, साओमी १२ एक्स र साओमी १२ प्रो यही डिसेम्बर महिनाको अन्तिमतिर बजारमा आउनेछ।
साओमीले हालसम्म आफ्नो नयाँ स्मार्टफोन सार्वजनिक हुनेबारे कुनै जानकारी दिएको छैन, तर कम्पनीले केही समयअघि साओमी १२ मा हुने फिचर बताएको थियो। साओमी १२ मा क्वालकम स्न्यापड्रैगन ८ जेन १ एसओसी प्रोसेसर हुने बताइएको छ।
गत महिना साओमी १२ का क्यामरा फिचरबारे पनि अनलाइनमा जानकारी लिक भएको थियो। यो फोनमा ५० मेगापिक्सलको प्राइमेरी क्यामरा हुनेछ। साथै अल्ट्रा–वाइड लेन्स, पेरिस्कोप लेन्स र टेलिफोटो लेन्स हुने अनुमान गरिएको थियो।
यसैगरी यी नयाँ स्मार्टफोनमा फुल एचडी प्लस डिस्प्ले, १०० वाटको फास्ट चार्जिङ र अन्डर–स्क्रिन क्यामरा हुनेछ।
ग्याजेट ३६०का अनुसार साओमी १२ सिरिजका स्मार्टफोन डिसेम्बर २८ मा सार्वजनिक हुने भनिएपनि यो मिति आधिकारिक रुपमा आइसकेको छैन। यसकारण उपभोक्तालाई डिसेम्बर अन्तिमसम्म प्रतिक्षा गर्न भनिएको छ।
