इन्टरनेट सेवा प्रदायक कम्पनी वर्ल्डलिंक कम्युनिकेसन्सले कीर्तिमानी आरोही तथा चर्चित डकुमेन्ट्री ‘१४ पिक्स’का निर्मल पुर्जाको उपस्थितिमा कन्सर्ट आयोजना गर्ने भएको छ। कम्पनीले यही चैत १० गते चितवनमा, चैत १२ गते पोखरा र काठमाडौंमा ‘वर्ल्डलिंक कार्निभल २.०’ आयोजना गर्ने भएको हो।
वर्ल्डलिंकका अनुसार हाल बेलायतमा रहेका पुर्जा चैत १० गते नेपाल आइपुग्ने छन्। सोही दिन चितवन महानगरपालिकाले उनको सम्मानमा नगर परिक्रमा सहित विशेष कार्यक्रम आयोजना गर्ने बताइएको हो।
नारायणीको तिरमा साँझ साढे ४ बजेदेखि हुने उक्त कार्यक्रमलाई वर्ल्डलिंकले मुख्य प्रायोजन गर्दैछ। त्यसक्रममा निर्मल पुर्जाको साथमा ठूलो स्क्रिनमा ‘१४ पिक्स’ डकुमेन्ट्री हेर्ने कार्यक्रम समेत राखिएको छ। चितवनमा हुने कार्यक्रममा राजु लामा र स्वप्निल शर्माको गायन प्रस्तुती समेत हुँदैछ।
चैत १२ गते एकैदिन पोखराको मितेरी पार्क र काठमाडौंको भृकुटीमण्डपमा ‘वर्ल्डलिंक कार्निभल फेस्ट २.०’ आयोजना हुनेछ। बिहान ११ बजेदेखि नै सुरू हुने दुवै कार्यक्रममा निर्मल पुर्जाको विशेष उपस्थिति रहने र उनले आफ्नो भनाइ समेत राख्ने बताइएको छ।
कन्सर्ट बेलुकी ८ बजेसम्म चल्ने वर्ल्डलिंकले जनाएको छ। काठमाडौंमा हुने कार्यक्रममा स्वप्न सुमन, सविन राई एन्ड फरोजको प्रस्तुति, बिनु शाक्यको नृत्य, सुमन कोइरालाको स्यान्डअप कमेडी हुनेछ।
त्यस्तै, पोखरामा हुने कार्यक्रममा सुशान्त केसी एन्ड द ब्यांगर्स र प्रवेशकुमार श्रेष्ठको प्रस्तुति, सजन श्रेष्ठको स्ट्यान्डअप कमेडी, क्रिस्टल कलाज डान्स क्र्युको नृत्य आदि समावेश छन्।
‘वर्ल्डलिंक कार्निभल २.०' मा बेली डान्स, गेम जोन, फुड जोन, किड्स प्ले जोन, फेस पेन्टिङ लगायतका आकर्षण हुने कम्पनीले जनाएको छ। कन्सर्टमा निःशुल्क प्रवेशको व्यवस्था मिलाइएको छ। पुर्जा वर्ल्डलिंक कम्युनिकेसन्सका ब्रान्ड एम्बेस्डर समेत हुन्।
