बिहीबार बिहानैदेखि रोकिएको नेपाल वायुसेवा निगम (नेपाल एयरलाइन्स)को उडान सुरू भएका छन्।
नेपाल एयरलाइन्सले क्याबिन क्रुहरूसँग छलफल गरी सहमति भएको बताएको छ।
यससँगै बिहीबार बिहान ९ बजे उडान तालिका रहेको निगमको जहाज साँझ ६ बजे उड्ने निगमका सहायक प्रवक्ता गणेश कुमार घिमिरेले जानकारी दिए।
'आज दिनभरको छलफलपछि बिहानदेखि रोकिएका उडान खुलिसकेका छन्' उनले सेतोपाटीसँग भने, 'सहमति भइसक्यो, अब यही समस्या दोहोरिदैँन।'
करारमा रहेर १५ वर्ष सेवा गरेका दुई जना विमान परिचारिका (आरती महर्जन र स्मिता गुवाजु) लाई बीना कारण सेवामा निरन्तरता नदिएको भन्दै क्याबिन क्रुहरूले बुधबार (हिजो) देखि नै विरोध गरेका थिए।
नेपाल वायुसेवा क्याबिन क्रु संघले पनि व्यवस्थापनको निकट व्यक्तिहरूको राम्रो सेवा सुविधा सहितको करार नविकरण गराइएको आरोप लगाएको थियाे।
संघले बिहीबार विज्ञप्ति निकाल्दै व्यवस्थापनको चरम लापरवाहीले तीन महिनाअघि नविकरण हुनुपर्ने करार नविकरण नाम तथा क्याबिन क्रु आइडी कार्ड अन्तिम समयसम्म नविकरण नगराई उडाइएको बताएको छ।
त्यस्तै ओएमए ९.८ अनुसार महिनाको अधिकतम सय घण्टा मात्र उड्न पाउने व्यवस्था भएतापनि रातदिन उडान गराइएको र यसले गर्दा क्याबिन क्रुहरू थकान भइ बिरामी पर्न गएकाले उडान असमर्थ भएको समेत बताएका थिए।
जसकारण बुधबार र बिहीबार समयमै उडान हुन सकेन। यात्रुहरू अलपत्र परे। बुधबार बिहान पौने दुई बजे निगमको दिल्ली उडान तालिका थियो। तर हडतालका कारण बेलुका पाँच बजे मात्र उडान भएको विमानस्थलका महाप्रबन्धक प्रेमनाथ ठाकुरले जानकारी दिए।
'विमानस्थलमा यात्रुको अवस्था देखेपछि तत्काल समाधान गर्न हामीले निगमलाई खबर गरेका थियौं' विमानस्थलका महाप्रबन्धक प्रेमनाथ ठाकुर भन्छन्, 'विमानस्थलमा यात्रु आएर बसिरहेका छन्। यात्रुले सास्ती भोगेका छन्। निगमकै कारण विमानस्थलको बदनाम भइरहेको छ।'
त्रिभुवन विमानस्थलमा मात्र होइन। काठमाडौंबाट मलेसिया र दुबईका लागि बुधबार राति उडेका नेपाल वायुसेवा निगमका दुईटा जहाज उतै रोकिए।
सह प्रवक्ता घिमिरेकाअनुसार लामो उडानमा सामान्यतया नयाँ सेट क्याबिन क्रु राखेर पठाउने गरिन्छ। तर, बुधबार भने दिल्ली र बैङ्लोर उडेका क्याबिन क्रुलाई नै मलेसिया र दुबई पठाइएको थियो।
यस क्रममा उनीहरूको ड्यूटी समय १० घण्टा पुरा भएको थियो।
जसकारण नियमअनुसार 'क्रु'लाई रेस्ट दिनु परेका कारण जहाज डिले हुन पुगेको हो।
निगमका चारवटा जेट र आन्तरिक उडानमा रहेका दुईवटा टुइनअटर विमानका लागि डेढसयभन्दा बढी क्याबिन क्रु छन्। यसमाा ५ जना स्थायी हुन् भने बाँकी करारमा कार्यरत छन्।
