पोखरा क्षेत्रीय अन्तर्राष्ट्रिय विमानस्थलसहित तीनवटै अन्तर्राष्ट्रिय विमानस्थलको व्यावसायिक भूमिस्थ प्रबन्ध (कमर्सियल ग्राउन्ड ह्यान्डलिङ) सेवा राष्ट्रिय ध्वजावाहक नेपाल वायुसेवा निगम (नेपाल एयरलाइन्सले) ले गर्ने भएको छ।
नेपाल नागरिक उड्डयन प्राधिकरण (क्यान) ले त्रिभुवन अन्तर्राष्ट्रिय विमानस्थलमा हिमालयले पाएको सेल्फ ग्राउन्ड ह्यान्डलिङ सेवा खारेज गर्ने निर्णय गरेपछि निगमलाई पोखरा विमानस्थलको पनि ग्राउन्ड ह्यान्डलिङ सेवाको बाटो खुलेको हो।
क्यानको गत पुस ४ गतेको बैठकले हिमालयले दुई वर्षअगाडि पाएको सेल्फ ग्राउन्ड ह्यान्डलिङ सेवा अर्को निर्णय नहुन्जेलसम्मका लाग खारेज गर्ने निर्णय गरेको थियो।
क्यानका प्रवक्ता ज्ञानेन्द्र भुलका अनुसार यस निर्णयबाट राष्ट्रिय ध्वजाबाहकका पक्षमा ठूलो सहयोग पुग्नेछ। अब तीनवटै अन्तर्राष्ट्रिय विमानस्थलमा निगमले कमर्सियल ग्राउन्ड ह्यान्डलिङ सेवा गर्नेछ। यसअघि निगमले त्रिभुवन अन्तर्राष्ट्रिय विमानस्थल र गौतमबुद्ध अन्तर्राष्ट्रिय विमानस्थलको ग्राउन्ड ह्यान्डलिङ गर्दै आएको छ।
'प्राधिकरणको वर्तमान आर्थिक अवस्थालाई समेत मध्यनजर गर्दै राष्ट्रिय ध्वजावाहकलाई संरक्षण गर्नुपर्ने राज्यको दायित्व भएकाले निजी वायुसेवा हिमालय एयरलाइन्सले पाएको सेल्फ ग्राउन्ड ह्यान्डलिङको अनुमति खारेज गरी वायुसेवा निगमको पक्षमा निर्णय गरेको छ,' क्यानको निर्णयमा भनिएको छ।
हिमालयलाई सेल्फ ह्यान्डलिङको अनुमति दिँदा निगमको २० प्रतिशत आम्दानी गुम्ने खतरा रहेको भन्दै क्यानले पछिल्लो निर्णयले निगमको साविक आम्दानी प्रभावित नहुने अवस्था बनेको उल्लेख गरेको ।
निर्देशिकाबमोजिम अनुमति पाएको एक वर्षभित्र ग्राउन्ड इक्युपमेन्ट खरिद गरी सेवा सञ्चालन गर्नुपर्नेमा हिमालयले सो नगरेपछि उसको अनुमति रद्द गर्ने निर्णय भएको क्यानले जनाएको छ।
पोखरा अन्तर्राष्ट्रिय विमानस्थल यही पुस १७ देखि व्यावसायिक रूपमा सञ्चालनमा आउँदैछ। उक्त विमानस्थलमा बिहीबार आन्तरिक उडानका बुद्ध एयर र यती एयरलाइन्सले डेमो उडान सफलताका साथ सम्पन्न गरेका छन्।
वायुयानको भूमिस्थ प्रबन्ध तथा अन्य ग्राउन्ड ह्यान्डलिङ सेवा सञ्चालन निर्देशिका, २०७२ को दफा ४ बमोजिम साताको ३५ वटाभन्दा बढी नियमित उडान गर्ने अन्तर्राष्ट्रिय वायुसेवा कम्पनीले सेल्फ ह्यान्डलिङ गर्न पाउने नियमअनुसार २०७७ असोजमा हिमालय एयरलाइन्सले यो अनुमति पाएको थियो।
