विद्यासुन्दर भन्छन्-नभएको बाघ दरबार कहाँबाट भत्काउनु?

सेतोपाटी संवाददाता

काठमाडौं, कात्तिक १४

काठमाडौं महानगरपालिकाको मेयर विद्यासुन्दर शाक्यले बाघदरबारको बारेमा फैलिएको सबै कुरा भ्रम भएको बताएका छन्।

‘बाघदरबार भन्ने कहिँ पनि छैन। यसको बारेमा फैलिएको सवै कुरा भ्रम मात्र हो। त्यसैले अहिलेको भवनलाई पूरै भत्काएर नयाँ भवन बनाउन लागेका हौं,’ राजधानीमा मंगलबार आयोजित पत्रकार सम्मेलनमा शाक्यले भने।

उनले सिंहदरबारको पूरै परिसरलाई सिंहदरबार भनेजसरी काठमाडौं महानगर रहेको त्यो भवन पनि बाघदरबार परिसरभित्र अवस्थित भवन भएको बताए।

महानगरपालिकाको कार्यालयसमेत रहेको सो भवनको मूल स्वरूप परम्परागत र डिजाइन पूरानै शैलीको हुने महानगरपालिकाको भनाइ छ।

पुरातत्व विभागले काठमाडौं महानगरपालिकालाई सो भवनको पुनर्निर्माण गर्दा त्यसको वास्तुकलाको संरक्षण गर्न सचेत गराउँदै रेट्रोफिट गर्न सुझाउँदै आएको छ।

महानगले भने उक्त भवन बाघदरबार नभई एक सय वर्ष पनि नपुगेको बाघदरबारमा अवस्थित हरिभवन भन्दै विभिन्न तथ्य प्रस्तुत गर्दै आएको छ।

बाघदरबार धेरै पहिला नै भत्किसकेको महानगरले जनाएको छ। महानगरअनुसार यो जुद्धशम्शेर राणाका छोरा हरिशम्शेरले आफ्ना लागि बनाएको भवन हो।

प्रकाशित मिति: मंगलबार, कात्तिक १४, २०७४ २०:०५

सिफारिस