गएराति भएको छुट्टा छुटै मोटरसाइकल दुर्घटनामा ४ जनाको ज्यान गएको छ।
धनुषाको सवैला नगरपालिका ४ कोठियाटोलमा मंगलबार बिहान भएको मोटरसाईकल दुर्घटनामा परी एक जनाको मृत्यु भएको छ।
मोटरसाईकलमा पछाडि सवार व्यक्ति घाईते भएका छन्। आज बिहान साढे २ बजे सवैलाबाट पटेर्वा तर्फ जाँदै गरेको ज ७ प ३७२० नम्बरको मोटरसाईकल दुर्घटना हुँदा जनकपुर उपमहानगरपालिका १८ महुवाका २५ वर्षिय मोटरसाइकल चालक राजु मुखियाको मृत्यु भएको ईलाका प्रहरी कार्यालय सवैलाले जनाएको छ।
घाईते भएका मोटरसाईकलमा पछाडि बस्ने सोही ठाउँका २७ वर्षिय कृष्ण पासवानको स्थानीय अस्पतालमा उपचार भईरहेको छ।
त्यस्तै धनुषाकै जनकपुर उपमहानगरपालिका १७ मनरपुर नजिकै हिजो बेलुकी मोटरसाईकलको ठक्करबाट एक युवकको मृत्यु भएको छ। हिजो बेलुकी ८ बजे नम्बर खुल्न नसकेको मोटरसाईकलको ठक्करबाट गम्भीर घाईते भएका स्थानीय २० वर्षिय राजेश महराको जनकपुर अञ्चल अस्पतालबाट थप उपचारको लागि विराटनगर तर्फ ल्याउने क्रममा बाटैमा मृत्यु भएको प्रहरी चौकी कपिलेश्वरले जनाएको छ।
दुर्घटना पश्चात् फरार रहेका मोटरसाईकलसहित चालकको खोजी भइरहेको छ।
उता सर्लाहीको मलङगवा नगरपालिका ३ मा हिजो बेलुकी मोटरसाईकलको ठक्करबाट एक महिलाको मृत्यु भएको छ। स्थानीय ६० वर्षिया जैबुल खातुनको मृत्यु भएको हो। गम्भीर घाईते खातुनको उपचारको क्रममा सर्वोत्तम अस्पताल वीरगन्जमा राति पौने २ बजे मृत्यु भएको स्थानीय प्रहरीले जनाएको छ।
आफ्नै घर अगाडि उभिएकी खातुनलाई हिजो बेलुकी साढे ८ बजे अनटेष्ट लेखिएको मोटरसाईकलले ठक्कर दिएको थियो। दुर्घटना पश्चात् फरार रहेका मोटरसाईकल चालकको खोजी भईरहेको जिल्ला प्रहरी कार्यालय सर्लाहीले जनाएको छ।
यस्तै मकवानपुरको हेटौडा उपमहानगरपालिका ४ मा मंगलबार बेलुकी मोटरसाइकलको ठक्करबाट पैदलयात्रीको मृत्यु भएको छ।
मृत्यु हुनेमा स्थानीय ३७ वर्षीय सुदर्शन विष्ट छन्। हिजो बेलुका साढे ८ बजे ना ४० प ५३ ९५ नम्बरको मोटरसाइकलको ठक्करबाट गम्भीर घाइते भएका विष्टको उपचारको लागि काठमाडौँ ल्याउने क्रममा बाटोमै मृत्यु भएको हो।
पैदलयात्रीलाई ठक्कर दिएर मोटरसाइकलसमेत पल्टिँदा घाइते भएका मोटरसाइकल चालकको चुरेहिल अस्पताल हेटौंडामा उपचार भइरहेको छ।
