बिहीबार राति १० बजेतिर क्वालालम्पुर उड्न लागेको एयर मालिन्दोको जहाज टेक अफ गर्न लाग्दा त्रिभुवन विमानस्थलको धावनमार्गबाट चिप्लियो। पाइलटले अकस्मात ब्रेक लगाउँदा जहाज अनियन्त्रित भएर धावनमार्गबाट ४० मिटर पर घाँसे मैदानमा पुग्यो।
जहाज र जहाजभित्र रहेका सबै यात्रु सुरक्षित थिए। ठूलो अप्रिय घटना त भएन। तर विमानस्थल भने १२ घन्टासम्म अवरुद्ध भयो।
जहाज हटाउन नसक्दा बिहीबार राति साढे २ घन्टा र शुक्रबार बिहान साढे ५ घन्टा विमानस्थल ठप्प भयो।
शुक्रबार बिहानै विमानस्थल पुगेका हजारौं यात्रुले बेला गन्तव्य उड्न पाएनन्। नेपाल आउन उडेका कैयौं यात्रु भारतका विभिन्न सहर र बंगलादेश पुग्नु पर्यो।
जहाजलाई रनवेमा ल्याउन त्रिभुवन विमानस्थल प्रशासनलाई १२ घन्टा लाग्यो।
अरू देशमा पनि यस्ता घटना हुँदा यात्रुले यस्तै सास्ती पाउँछन् त?
आवश्यक सामग्री तयारी अवस्थामा भएको भए यो काम १/२ घन्टामै सकिने र यात्रुले सास्ती नपाउने प्राविधिकहरूको बताउँछन्।
विमानस्थलमा कार्यरत एक प्राविधिकका अनुसार फलामको वायर (डोरी) नहुँदा जहाज तान्न ढिला भएको हो।
घाँसे मैदानबाट पिच भएको ठाउँसम्म ल्याउन पुस ब्याक ट्रकले डोरी लगाएर तान्नु पर्थ्यो। तर ट्रकलाई पिचभन्दा बाहिर लिन सक्ने अवस्था थिएन।
धावन मार्ग र जहाजको दुरी ४० मिटर थियो। यति लामो डोरी विमानस्थलमा थिएन। भएका डोरी गाँसेर राति जहाज तान्ने प्रयास गरिएको थियो तर गाँसेको तार चुडिएको विमानस्थलका एक अधिकारीले जानकारी दिए।
रातभर २ फिटमात्र तानिएको जहाज शुक्रबार भने आधा घन्टामा रनवेमा ल्याइएको थियो।
‘रातिको समयमा बजार खुल्ला कतै थिएन,’ ती प्राविधिकले भने,‘विमानस्थलमा त्यति लामो डोरी थिएन।’
डोरी नभएपछि रातभर जहाज तान्ने काम रोकिएको स्रोतको भनाइ छ।
बिहान नेपाली सेनाले डोरी ल्याएपछि मात्र जहाज तान्न सुरु भयो। दुइटा पुस ब्याक ट्रक, दुइटा क्रेन र दुइटा जेसिबीको सहायताले जहाज तानिएको थियो।
जहाज तान्न नेपाली सेनाका ७०, नेपाल प्रहरीका ३० र नेपाल वायु सेवा निगमका ३० जना परिचालन गरिएको थियो।
आधा घन्टामै जहाज धावनमार्गमा ल्याइयो।
विमानस्थलका अधिकारीहरुका अनुसार यदि त्यस्तो फलामको डोरी राति नै उपलब्ध भएको भए बिहान उज्यालो हुँदा/नहुँदै विमानस्थल सुचारू भइसक्ने थियो। डोरीको अभावमा आधा घन्टामा सकिने कामलाई १२ घन्टा लाग्दा सात घन्टा विमानस्थल बन्द भयो।
विमानस्थल कार्यालयका नायब प्रबन्ध निर्देशक राजकुमार क्षेत्री भने मौसम र भौगलिक कठिनताले समस्या भएको बताउँछन्।
विमानस्थलमा आवश्यक जनशक्ति र साधन सबै भए पनि पानी परेको, रातीको समय भएकोले लामो समय लागेको उनको भनाइ छ।
‘पानी परेकोले जहाजको नोज (अगाडिको भाग) तलतिर गाडिएको थियो यस्तोमा कतै पनि कुनै क्षति नपुर्याएर तान्नु पर्ने हाम्रो नियमअनुसार उच्च सावधानी अपनाउनु पर्ने थियो, त्यसैले हामीलाई ढिला भयो’ क्षेत्रीले भने।
बिहीबार मलेसियाका लागि उड्ने तयारीमा रहेको मालिन्डो एयरको बोइङ ७३७–९०० जहाज धावनमार्गमै आकस्मिक रूपमा रोक्न खोज्दा घाँसे मैदानमा गएर फसेको थियो।
जहाजलाई शुक्रबार बिहान पौने ११ बजे धावनमार्गमा तानेर बुद्ध एयरको ह्यांगर नजिकै पार्किङ गरिएको छ। जहाजमा उल्लेख्य क्षति नदेखिएको र एयर मालिन्दोको इन्जिनियरिङ टोली काठमाडौं आएर परीक्षण गरिरहेको विमानस्थलका प्रबन्धक क्षेत्रीले जानकारी दिए।
२/३ दिनभित्र उक्त विमान उडिसक्ने अधिकारीहरूको भनाइ छ।
याे पनि
