- प्रतियोगितापछि काठमाडौं र मोफसलका ५ स्थानमा प्रदर्शनी हुने
- फोटो अफ दि इयरलाई १ लाख रुपैयाँ पुरस्कार दिइने
- सात विधामा भाग लिन पाइने
- व्यवसायिक र सौखिन फोटोग्राफर तथा फोटोपत्रकारले भाग लिन पाउने
- फोटो दर्ता बुधबार अपरान्हदेखि असार ६ गते राति ११ बजेर ५९ मिनेटसम्म गर्न सकिने
नेपाली फोटो पत्रकारहरुको छाता संगठन फोटो पत्रकार (पिजे) क्लबले आइएमई र ग्लोबल आइएमई बैंकसँगको सहकार्यमा छैटौं संस्करणको फोटो प्रतियोगिता तथा प्रदर्शनीको घोषणा गरेको छ। क्लबले बुधबार दिउँसो काठमाडौंको भृकुटीमण्डपस्थित नेपाल पर्यटन बोर्डमा पत्रकार सम्मेलन गर्दै उक्त प्रतियोगिता तथा प्रदर्शनीको घोषणा गरेको हो ।
विभिन्न सात विधामा प्रतिस्पर्धा गराइने प्रतियोगितामा भाग लिन चाहने प्रतियोगीले बुधबारबाटै फोटो दर्ता गराउन सक्नेछन्। क्लबको आधिकारिक वेभसाइट मा गएर दिइएको निर्देशनअनुसार फोटो दर्ता गर्न सकिने क्लबले जनाएको छ।
प्रतियोगितामा व्यावसायिक र सौखिन सबैखाले फोटोग्राफर तथा फोटो पत्रकार सहभागी हुन पाउनेछन्। प्रतियोगितामा विदेशी नागरिक तथा विदेशमा खिचिएको फोटोले भने सहभागिता जनाउन पाउने छैनन्। तर, खेलकुद विधाको हकमा भने नेपाल बाहिर खिचिएको तस्बिर भने समावेश गराउन पाइनेछ। उक्त फोटोमा नेपाली वा नेपाल झल्कने विषय भने कतै न कतै देखिएको हुनुपर्ने छ।
बुधबारबाटै सुरू हुने दर्ता प्रक्रिया असार ६ गते मध्यरातमा १२ बजे बन्द हुनेछ । पिजे क्लबले एक भव्य कार्यक्रमबीच सातै विधाका विजेताको घोषणा गरेर विजेतालाई पुरस्कार वितरण गर्नेछ। पुरस्कार वितरण कार्यक्रमपछि साउन १५ देखि २१ गतेसम्म काठमाडौंको बबरमहलस्थित नेपाल आर्ट काउन्सिलमा सात विधाका १ सय ६० भन्दा बढी उत्कृष्ट फोटोहरुलाई प्रदर्शनीमा राखिनेछ।
काठमाडौंमा सात दिनको फोटो प्रदर्शनी गरिसकेपछि मोफसलका पाँच स्थानमा पनि उक्त फोटोहरू प्रदर्शनी गरिने पिजे क्लबका अध्यक्ष विकास कार्कीले बताए । उनका अनुसार विराटनगर, धनगढी, नेपालगञ्ज र पोखरामा तीन/तीन दिन फोटो प्रदर्शनी गरिनेछ ।
प्रतियोगितामा यसपटक १ हजार ५ सय भन्दा बढी फोटोग्राफर तथा फोटो पत्रकारका १३ हजारभन्दा बढी फोटोले विभिन्न विधामा सहभागिता जनाउने आयोजकको अपेक्षा छ। दुई वर्षअघि सम्पन्न अघिल्लो संस्करणमा करिब १२ सय फोटोग्राफर तथा फोटो पत्रकारका ११ हजार फोटो प्रतिस्पर्धामा उत्रिएका थिए।
न्यूज फोटो, डेली लाइफ, एक्सपिरीयन्स नेपाल कल्चर एण्ड टुरिजम, नेचर एण्ड वाइल्डलाइफ, नेपाल स्माइल, स्पोर्टस र फोटो स्टोरी गरी सात विधामा प्रतिस्पर्धा हुनेछन्।
न्युज फोटो विधामा २०७३ साल बैशाख १ गते देखि २०७४ चैत्र मसान्तसम्म खिचिएका तस्बिरले मात्रै प्रतिस्पर्धा गर्न पाउनेछन्। अन्य विधामा जहिलेसुकै खिचिएका तस्बिरहरू पठाउन सकिने छ।
अन्य कुनै प्रतियोगितामा मुख्य विजेता भइसकेका र यही प्रतियोगिताको अघिल्ला संस्करणका विजेता फोटो यो प्रतियोगिताका लागि समावेश गराउन पाइने छैन । ५ लाख २० हजार रुपैयाँ कुल पुरस्कार राशी रहेको प्रतियोगिताको मुख्य फोटो अफ दि इयरको विजेताले १ लाख रुपैयाँ पाउनेछन् भने अन्य सबै सात विधाका विजेताले जनही ३० हजार, उपविजेताले जनही २० हजार तथा तेस्रो हुनेले १० हजार रुपैयाँ पाउने छन्।
प्रत्येक विधामा प्रतियोगीले बढीमा ३ वटा फोटो, फोटो स्टोरीमा बढीमा २ वटा स्टोरी र प्रत्येक स्टोरीमा ४ देखि १२ वटासम्म फोटो दर्ता गर्न पाउनेछन् ।
कार्यक्रममा आइएमई समूहका अध्यक्ष तथा नेपाल उद्योग वाणिज्य महासंघका उपाध्यक्ष चन्द्र ढकालले फोटो प्रतियोगिता र प्रदर्शनीको प्रायोजनलाई निरन्तरता दिइने वचन दिए। ‘पत्रकारिता र दैनिक जीवनमा फोटोको महत्व विशेष छ । तर पनि हामी यो कार्यक्रमसँगको सहकार्यलाई आगामी वर्षहरुमा निरन्तरता दिनेछौं,’ ढकालले भने, ‘नेपालकै गौरवका रुपमा स्थापित हुँदै गएको यो प्रतियोगिता र प्रदर्शनीमा सफलताका लागि हामी क्यामेरा चलाउने सबैलाई शुुभकामना दिन चाहन्छौं ।’
नेपाल चेम्बर अफ कमर्स तथा आइएमएसका अध्यक्ष दीपक मलहोत्राले यस्ता प्रतियोगिताको आयोजना गरेर पिजे क्लबले सह्रानीय काम गरेको बताए। ‘फोटोले जुन कुरा उजागर गर्छ । अरु कसैले गर्न सक्दैन । त्यसैले पिजे क्लबले अहिले बनेको स्थायी सरकारका कामकारबाहीलाई फोटो मार्फत प्रस्तुत गरेर आफ्नो भूमिका निर्बाह गर्ने छ भन्ने विश्वास लिएको छु,’ उनले भने, ‘ हामी ६ वर्षदेखि साथमा छौं । हरेक वर्ष सहयोग गर्न तत्पर छौं ।’
नेपाल पर्यटन बोर्डका वरिष्ठ निर्देशक आदित्य बरालले फोटोले पर्यटन विकासमा महत्वपूर्ण भूमिका खेल्ने भएकोले बोर्डले सधैं यस्ता कार्यकक्रमलाई सहकर्मीको रुपमा साथ दिने बताए ।
यस आइएमई–ग्लोबल आइएमई बैंक नेपाल फोटो प्रतियोगिता २०७५ को ६ सदस्यीय निर्णायक मण्डल रहेको छ । दक्षिण एसिया तथा भारतका वरिष्ठ फोटोग्राफर पाब्लो बारथोलोमिओको अध्यक्षता रहने निर्णायक मण्डलमा वरिष्ठ पत्रकार तथा बाह्रखरी डटकमका प्रधान सम्पादक प्रतीक प्रधान, वरिष्ठ फोटोपत्रकार, क्लबका संस्थापक अध्यक्ष तथा सदृश्य डटकमका फोटो सम्पादक चन्द्रशेखर कार्की, वरिष्ठ फोटोग्राफर मणि लामा, केयु स्कुल अफ आर्टका कार्यक्रम संयोजक सुजन चित्रकार र एजेन्सी फ्रान्स प्रेस (एएफपी) का फोटोपत्रकार एबम क्लबका निवर्तमान अध्यक्ष प्रकाश माथेमा रहेका छन्।
