एक महिने रमजान अन्त्य गरी यसरी मनाइयो इद उल फित्र (फोटोफिचर)

नारायण महर्जन

काठमाडौं, असार २

एक महिने रमजान पर्व समापन भएको अवसरमा आज नेपालभरका मुस्लिम समुदायले विशेष नमाज पाठ गरी इद उल फित्र पर्व मनाएका छन्।

यो पर्व मनाएपछि रमजानको एक महिने व्रत सकिन्छ।

अरबी पात्रो हिजरी संवत्अनुसार दशौं महिनाको पहिलो दिन देशभर मुस्लिम समुदायले विशेष नमाज पाठ गरी ठूलाबडाबाट आशीर्वाद लिएर इद उल फित्र पर्व मनाउने गर्छन्।

दशौं महिनाको पहिलो दिन आज विशेष नमाज पाठ गरेपछि तीन दिनसम्म आफूभन्दा ठूला बडाकहाँ गएर आशीर्वाद लिइन्छ। यस पर्वमा आफूभन्दा सानालाई आर्शिवाद दिने गरिन्छ। आशिर्वाद लिन आउने आफन्तलाई सेवइ, खजुरलगायत मीठा खानेकुरा खान दिने चलन छ।

खुशीपूर्वक दान गरेर दिन दुःखी एवं गरिबलाई बाँडिने भएकाले यो पर्वलाई इद उल फित्र भनिएको हो। यस अवसरमा आज बिहान स्नान गरी नयाँ कपडा लगाएर नेपाली जामे मस्जिद घण्टाघरमा विशेष नमाज पाठ गरेपछि ठूलाबडाकहाँ आर्शीवाद लिने क्रम सुरू भएको छ।

यस पर्वका उपलक्ष्यमा सरकारले विगत वर्षमा सार्वजनिक बिदा दिने गरे पनि यस वर्ष काटिएकामा मुस्लिम समुदायले विरोध जनाएका छन्। गत जेठ ३ गतेदेखि मुस्लिम समुदायको एक महिना लामो व्रत (रोजा) सुरू भएको थियो।

हेर्नुहोस् तस्बिरहरू :