पहिरोले घर भत्काउँदा जाजरकोटमा २ जनाको मृत्यु भएको छ। जिल्लाको जुनीजाँदे गाउँपालिका ६ छिर्कस्थित बिहिबार राति भक्तबहादुर बुढाको घर पहिरोले भत्काउँदा उनकी श्रीमति ५५ वर्षीय लली बुढा र नातिनी ९ वर्षीय सृजना बुढाको मृत्यु भएको हो।
घटनामा परि तीन जना घाईते भएका छन्। घाईते हुनेहरुमा भक्त बहादुर बुढा, उनका नाती पारस बुढा र नातिनी खिमा बुढा छन्। घाईतेमध्ये भक्तबहादुर र नातिनी खिमाको अवस्था गम्भीर रहेको जिल्ला प्रहरी कार्यालय जाजरकोटले जनाएको छ।
प्रहरीका अनुसार भक्तबहादुरको टाउको, ढाड छातिमा चोट लागेको छ भने खिमाको पेटको भित्री भागमा चोट लागेको छ।
माथिल्लो भागबाट रुखसहितको पहिरो घरमा खसेर आधा घर भत्किएको प्रहरीले जनाएको छ। घटनामा घरमा पालिएका पशु चौपाया समेत मरेका छन्।
घाईतेहरुको उपचारको लागि जिल्ला अस्पताल जाजरकोट ल्याइएको प्रहरीले जनाएको छ।
