सुर्खेतमा सञ्चालित एम्बुलेन्सहरूको नयाँ भाडादर तय गरिएको छ।
जिल्लामा एम्बुलेन्स सञ्चालन गर्दै आएका एम्बुलेन्सहरू सञ्चालनकर्ताहरूले नयाँ भाडादर तय गरेका हुन्।
अब वीरेन्द्रनगर उपत्यकाभित्र ‘ग’ वर्गको लागि आउने र जाने गरेर ४०० तथा ‘ख’ वर्गको सेवाका लागि ८०० भाडा कायम गरिएको छ।
सुर्खेतमा वीरेन्द्रनगर उपत्यकाभन्दा बाहिरको हकमा भने प्रति किलोमिटर ४० रुपैयाँका दरले एम्बुलेन्सहरूले भाडा लिने संयुक्त एम्बुलेन्स चालक संघ नेपाल शाखा कार्यालय सुर्खेतका अध्यक्ष डिलबहादुर नेपालीले जानकारी दिए।
यस्तै, सुर्खेतको छिन्चुदेखि जाजरकोटसम्मको मार्गमा भने न्यूनतम भाडादर ५ हजार ५०० रुपैयाँदेखि अधिकतम ११ हजार रुपैयाँ तोकिएको छ।
कर्णाली राजमार्गमा सुर्खेतको बड्डिचौरदेखि वीरेन्द्रनगरसम्मको लागि २ हजार ३०० रुपैयाँ भाडा तोकिएको छ भने सुर्खेतदेखि कालीकोटसम्मका लागि १४ हजार रुपैयाँ तोकिएको छ। बड्डीचौरदेखि पश्चिमतर्फका जिल्लाभित्रका क्षेत्रहरूका लागि भने भाडादर ५ हजार ५०० तय गरिएको छ। सुर्खेतको पश्चिममा पर्ने गुटु बजारदेखि वीरेन्द्रनगरसम्मको एम्बुलेन्स भाडा ७ हजार तोकिएको छ।
धुलियाबिटदेखि धुलाबारीसम्मका लागि न्यूनतम एक हजारदेखि भेडाबारीसम्मको ५ हजार ७०० रुपैयाँ तय गरिएको छ।
त्यसैगरी, रत्नराजमार्गतर्फ वीरेन्द्रनगरदेखि कोहलपुरसम्मको एम्बुलेन्स भाडा ५ हजार तोकिएको छ भने भारतको लखनउसम्मका लागि १५ हजार रुपैयाँ तोकिएको अध्यक्ष नेपालीले जानकारी दिए।
सुर्खेत–दैलेख सडकखण्डमा न्यूनतम १ हजार २ सयदेखि अधिकतम ६ हजारसम्म कायम गरिएको छ।
अध्यक्ष नेपालीका अनुसार वीरेन्द्रनगरदेखि नारायणगढसम्मको लागि २५ हजार रुपैयाँ तथा काठमाडौं र पोखराका लागि ३० हजार रुपैयाँ भाडा कायम गरिएको छ।
