पितृको सम्झनामा छरियो सतबीज, हेर्नुस् तस्बिरमा

नारायण महर्जन

काठमाडौं, मंसिर ९

आज मंसिर कृष्ण चतुर्दशीका अर्थात बाला चतुर्दशी।

पशुपतिनाथलगायत देशका विभिन्न शक्तिपीठमा सतबीज छरेर बाला चतुर्दशी मनाइएको छ।

नेपालमा मनाइने विभिन्न धार्मिक संस्कृतिमध्येको बाला चर्तुदशीलाई विशेष गरी सनातन हिन्दू धर्मअन्तर्गत विशिष्ट महत्वको मान्ने गरिन्छ। बाला चतुर्दशी पर्वलाई सतबीज रोपण पर्वका रूपमा लिँदै विशेष गरी पितृ उद्धारका लागि उनीहरूको सम्झनामा सतबीज छर्ने गरिन्छ।

बाला चर्तुदशीको अघिल्लो दिन मार्गकृष्ण त्रयोदशीको दिन पशुपतिनाथलगायत देशका अन्य शिवालयमा दीप प्रज्वलन गरी रातभरि जाग्राम बसी चतुर्दशीको दिन सतबीज रोपण गरिने गरिएको छ।

यसरी बत्ती बाल्दा पितृलोक झलमल्ल हुन्छ भन्ने विश्वास रहिआएको छ। सुरूमा सप्तबीज (धान, जौ, तिल, गहुँ, चना, मकै, कागुनो) छर्दै मृगस्थलीमा रहेको गणेशमन्दिर नजिक आइपुगेपछि मूर्तिलाई हल्लाउँदै ठूलो स्वरले दिवङ्गत आत्माले पाउने गरी सन्देश पुर्‍याउन अनुरोध गर्ने प्रचलन अर्को विशिष्टता हो।

बोलीचालीको भाषामा सतबीउ छर्ने भनिने सतबीजरोपणले पितृको उद्धार हुन्छ भन्ने जनविश्वास छ। अन्य शिवालयभन्दा पशुपतिनाथमा गरिने सतबीज रोपणको ठूलो महिमा छ। यसैकारण पनि पूर्व मेचीदेखि पश्चिम महाकालीसम्मका मानिस पितृउद्धारको उद्देश्यले पशुपति आउने गर्छन्।

तस्बिरहरू: