तुलसीपुरको बसपार्क क्षेत्रमा गएराति तीन वटा पसलमा चोरी भएको छ।
तुलसीपुर बसपार्क पुलचोक आसपासका तीनवटा पसलमा गएराति चोरी भएको असई सोमराज हमालले जानकारी दिए।
लकडाउनको मौका छोपी प्रेम बाँठाको मदिरा डिलर, पुलपारीको एउटा फेन्सी पसल र नजिकैको अर्कौ एउटा श्रृगांर पसलमा चोरी भएको हमालले बताए ।
असई हमालले मध्यराततिर उक्त चोरी भएको हुन सक्ने अनुमान गरेका छन्।
मदिरा पसलका सञ्चालक बाँठाले ५० देखि ६० हजारसम्मको मदिरा चोरी भएको बताएका छन्।
अन्य दुईवटा पसलमा भएको चोरीका बारेमा अनुसन्धान भइरहेको छ।
चोरले ती पसलका सटरमा लगाएको ताला फोडेर चोरी गरेको देखिएको छ।
पीडितहरु सोमबार बिहान जाहेरी दिन इलाका प्रहरी कार्यालय तुलसीपुर पुगेका छन्।
यसैबीच सोमबार बिहान ४ बजेतिर प्रहरीले चोरीमा संलग्न भएको आशंकामा दुई बालकलाई पक्राउ गरेको छ।
पक्राउ परेका बालकमध्ये एकको उमेर १० र अर्काको उमेर १५ वर्ष रहेको छ। उनीहरुलाई इप्रका तुलसीपुरमा राखिएको छ।
एउटालाई पसल र अर्कोलाई होटेलमा चोरी गर्ने प्रयास गरेको आशंकामा पक्राउ गरिएको असई हमालले जानकारी दिएका छन्।
केही दिन पहिले मात्रै तुलसीपुरको मुख्य बजारको एउटा सुन पसलमा चोरी भएको थियो।
