बैतडीमा ट्रक दुर्घटना हुदा घाइते भएका एक जनाको मृत्यु भएको छ।
दुर्घटनामा गम्भीर घाइते भएका डोटी जोरायल गाउँपालिका वडा नम्वर २ बुडरका ट्रक सहचालक २० वर्षीय भुवन सुब्बाको मृत्यु भएको प्रहरीले जनाएको छ।
जिल्ला प्रहरी कार्यालय बैतडीका सूचना अधिकारी किशन चन्दले उनको हिजो बेलुका पाटन अस्पतालमा मृत्यु भएको बताए।
त्यस्तै दुर्घटनामा घाइते भएका ट्रकका चालक कैलालीको मालाखेतीका ३० वर्षीय लवकुमार तामाङलाई डडेल्धुरामा उपचार सम्भव नभएपछि सेती प्रादेशिक अस्पताल धनगढी ल्याइएकोमा त्यहाँ पनि उपचार हुन नसकेपछि कोहलपुर मेडिकल कलेज लगिएको चन्दले बताए।
दाङबाट सिमेन्ट बोकेर बझाङ जादै गरेको ट्रक आइतबार बेलुका बैतडीको पाटन नगरपालिका ८ धारीमा दुर्घटना भएको थियो। ट्रक जयपृथ्वी राजमार्ग अन्तर्गत सडकबाट ७ सय मिटर तल खसेको थियो।
