राष्ट्रपति विद्यादेवी भण्डारी र प्रधानमन्त्री केपीशर्मा ओलीलाई फेसबुकमार्फत अश्लिल शव्द प्रयोग गरी गाली गरेको आरोपमा एक जना पक्राउ परेका छन्।
पोखरा १९ पुरञ्चौरका दुर्गादत्त बास्तोलालाई प्रहरीले पक्राउ गरेको हो।
राष्ट्रपति र प्रधानमन्त्रीलाई अश्लिल शव्द प्रयोग गरी फेसबुकमा स्टाटस लेखेको भन्दै बास्तोला विरुद्ध पोखराका शिवप्रसाद अधिकारी, सम्पन्न श्रेष्ठ र सुष्मी श्रेष्ठले प्रहरीमा उजुरी दिएका थिए। उनीहरु नेकपाका संगठन सम्वद्ध व्यक्तिहरु हुन्।
उजुरी आएपछि अनुसन्धान गर्न पक्राउ गरेको कास्की प्रहरी प्रमुख एसपी जीवनकुमार श्रेष्ठले बताए। ‘साइबर क्राइमको उजुरी आएपछि हामीले साइबर अपराध हेर्ने विभागमा पठायौं, एसपी श्रेष्ठले सेतोपाटीलाई भने, ‘पुर्जी लिएर आज पक्राउ गरेका छौं, अनुसन्धानका लागि पनि माथि नै पठाउँछौं।’
बास्तोलाले लेखेको स्टाटस भने अहिले मेटेका छन्।
बास्तोला नेपाली काँग्रेसको तत्कालिन पुरञ्चौर गाविस समितिको सभापति समेत थिए। पोखरा महानगरमा गाविस गाभिएपछि उनी पोखरा वडा नं. १९ का सह–संयोजक भएका थिए।
बास्तोलालाई पार्टीको स्थानीय समितिले नै कारबाही गरेर जिम्मेवारीमुक्त पारेको काँग्रेस कास्कीका सभापति कृष्ण केसीले बताए।
‘उहाँ काँग्रेसको कार्यकर्ता होइन, सभापति केसीले सेतोपाटीलाई भने, ‘उहाँले पार्टीभित्र पनि भाँडभैलो गर्ने र जे मन लाग्यो त्यही बोल्ने गरेपछि कारबाही गरिसकेको छ।’
बास्तोलाले काँग्रेस कास्कीकै सभापति केसी सहभागी भएको कार्यक्रम भाँड्न खोजेको र जे पायो त्यही बोलेको भन्दै दुई महिना अघि नै कांग्रेसले कारबाही गरेको थियो।
