भारत सिक्किम र गोवा तथा श्रीलंकाको क्यासिनोमा अनलाइनमार्फत् क्यासिनो खेलाएर नेपालीलाई ‘टाट’ पल्टाउने गिरोहका दुई नेपाली ‘एजेन्ट’ आइतबार पक्राउ परे।
महानगरीय अपराध महाशाखाको टोलीले प्यूठान नौवाहिनी गाउँपालिका-४ घर भई ललितपुर झम्सिखेल बस्ने ३८ वर्षीय डुबलाल घर्तीमगर र इमाडोल बस्ने नौवाहिनीकै २० वर्षीय सुनिल पुनमगरलाई पक्राउ गर्यो।
पक्राउ पर्ने डुबलाल ‘दीपक गुरूङ’ उपनामले चिनिछन्। उनी नेपाल, भारत र श्रीलंकाका क्यासिनोमा नेपालीको सम्पर्क स्थापित गर्ने ‘मुख्य व्यक्ति’ नै हुन्।
उनले ‘दीपक गुरूङ’को नाममा भारत सरकार आयकर विभागको स्थायी लेखा कार्ड र आधार कार्डसमेत बनाएको अनुसन्धानमा देखिएको छ।
सुनिल डुबलालका सहयोगी हुन्। डुबलालको निर्देशनमा सुनिल क्यासिनो खेल्ने नेपालीबाट पैसा उठाउने काम गर्थे।
डुबलाललाई नक्सालबाट र सुनिललाई इमाडोलबाट महाशाखाले पक्राउ गरेको थियो। यी दुईले लकडाउनपछि क्यासिनो खेलाएर नेपाली नागरिकको करिब सात करोड रुपैयाँ ‘टाट’ पल्टाएको आशंकातर्फ प्रहरी अनुसन्धान छ। प्रारम्भमा उनीहरूले पचास लाख रुपैयाँ ठगेको उजुरीपछि प्रहरीले यो अपरेसन चलाएको देखिन्छ।
यीमध्ये डुबलालको नेपाल र भारतमा लामो क्यासिनो अनुभव छ। महाशाखाका अनुसार उनी सुरूमा २०७० सालमा लैनचौरको मल्ल क्यासिनोमा काम गर्थे, सो क्यासिनोमा नेपालीहरू छिराउँथे। क्यासिनो छिर्ने नेपाली ग्राहक र सञ्चालकबाट ‘कमिसन’ उठाउँथे।
यहीबेला प्रहरीले काठमाडौंका क्यासिनोमा नेपाली छिराउन कडाइ गर्न थाल्यो। नेपाली क्यासिनोमा कडाइपछि डुबलाल सिक्किम छिर्छन्।
अनुसन्धान अनुसार सिक्किमको एक क्यासिनो (हाल प्रहरीले नाम नखुलाएको)मा नेपालका विभिन्न सहरबाट उनी नेपाली लैजाने गर्थे।
सिक्किमको क्यासिनोमा एजेन्ट भएर काम गर्दागर्दै डुबलालको गोवाको एक क्यासिनो (नाम नखुलाइएको)मा सम्बन्ध विस्तार हुन्छ। उनी त्यहाँको क्यासिनोमा नेपाली लगेर क्यासिनोको ‘टेबुल’ नै सञ्चालन गर्थे।
गोवाको क्यासिनोमा ‘टेबुल’ सञ्चालन गरेर काम थालेपछि डुबलालको श्रीलंकाको बेलिजबेट क्यासिनोसँग सम्पर्क हुन्छ। यसपछि उनी गोवामा नेपाली पुर्याएर श्रीलंकन क्यासिनोका ग्राहकसँग नेपालीलाई जुवा खेलाउँथे।
डुबलालले करिब तीन वर्ष नेपालबाट ग्राहक सिक्किम र गोवामा पुर्याएर श्रीलंकनसँग क्यासिनो खेलाइरहेका थिए।
‘धन्दा’ जारी नै थियो। तर, कोरोना महामारीका कारण चैतमा नेपालमा लकडाउन सुरू भयो। लकडाउन सुरू भएपछि नेपाली ग्राहक सीमा छिचोलेर सिक्किम र गोवा जान पाएनन्।
यसपछि डुबलाल सिक्किम र श्रीलंकाका सञ्चालकसँग योजना बनाएर नेपाल फर्किन्छन् र आफूसँग सम्पर्कमा रहेका ग्राहकसँग त्यहाँका क्यासिनोमा जुवा खेलाउने बचन दिन्छन्।
महाशाखाका अनुसार लकडाउनको विषम परिस्थितिमा कसरी क्यासिनो खेलाउने भन्ने योजना उनले गोवाबाट बनाएर आएका थिए। उनले ती क्यासिनोसँगको सम्पर्क अनलाइनबाटै विस्तार गराए।
क्यासिनो खेलाउने युजरनेम र पासवर्ड त्यहाँका क्यासिनोबाटै बनाएर ग्राहकलाई दिलाउँछन्।
अब ग्राहक युजरनेम र पासवर्ड प्रयोग गरेर भारतीय र श्रीलंकनसँग अनलाइनमै ‘डिल’ गरी आफ्नै घर तथा बसेको कोठाबाट क्यासिनो खेल्न थाल्छन्।
‘पहिले के कति रुपैयाँको खेल्ने हो, डिल दुबैतर्फका ग्राहकबीच भएको देखिन्छ,’ प्रहरी अनुसन्धानले भन्छ, ‘डिलपछि डुबलालले सहयोगी सुनिललाई पैसा उठाउन लगाउँछन्।’
महाशाखा प्रमुख एसएसपी दीपक थापाको भनाइ छ, ‘बैंक, आइएमई, हुण्डीमार्फत् पैसा उठाइन्छ, पठाइन्छ। नेपाली, भारतीय र श्रीलंकनहरू अनलाइनमै क्यासिनो खेल्न थाल्छन्।’
पछिल्लो समय सिक्किम, गोवा र श्रीलंकाको क्यासिनोसँग जोडिएर खेलिरहेका व्यक्ति हुन्- दिलबहादुर बुढाथोकी (दमक), अमृत गुरूङ (पोखरा), मुकुन्द थापा (भक्तपुर), गणेश केसी (पेप्सिकोला), दीपेन्द्र राई (जोरपाटी) र मदन कार्की (काठमाडौं)।
क्यासिनो ‘लत’ बसेका उनीहरू जब डुब्न थाल्छन्, त्यसपछि आफैं प्रहरी प्रधान कार्यालय, गृह मन्त्रालय, अख्तियार दुरुपयोग अनुसन्धान आयोगलगायत निकायमा उजुरी गर्न थाल्छन्।
‘यी छ जनाले ५० लाख डुबेको उजुरी हामीलाई गृह मन्त्रालय र प्रहरी प्रधान कार्यालयबाट एजेन्ट खोजीको आदेशसहित आएको थियो,’ महाशाखा प्रमुख एसएसपी थापाले भने, ‘उजुरी आएपछि करिब तीन साता अनुसन्धान गर्दा यी दुई व्यक्ति समातिएका हुन्।’
थापाका अनुसार असोज २५ गते महानगरीय अपराध महाशाखामा ती निवेदनको बोधार्थ आएको थियो। उजुरीपछि महाशाखाले अनुसन्धान अधिकृत तोकेर छानविन थालेको हो।
यसक्रममा महाशाखाले लामो अनुसन्धान गरेको छ। अनुसन्धानमा क्यासिनो खेलाउने व्यक्ति मात्र फेला परेनन्, सीमावर्ती सहरमा पैसा संकलन गरेर भारत पुर्याउने र जितेका विदेशी ग्राहकलाई नेपाल ल्याएर आइसीमा पैसा बुझाउने अन्य एजेन्टहरू पनि देखिएका छन्।
‘धेरैजसो एजेन्ट सीमावर्ती क्षेत्रमा गाडीसहित पैसा वारपार गर्ने देखिन्छन्, हामीले काँकडभिट्टामा एक एजेन्ट फेला पारेका छौं,’ थापाले भने, ‘ती एजेन्टको खोजी भइरहेको छ।’
अहिले नेपालबाट भारू वा डलर लिएर भारत पस्न कडाइ छ। ‘कम्तीमा १५ सय डलर मात्र लिएर, त्यो पनि प्रयोजन खुलाएर मात्र भारत जान पाइन्छ,’ थापा भन्छन्, ‘यो सामान्य प्रक्रियाले उनीहरूलाई कारोबार गर्न असहज हुने हुनाले सीमामै मान्छे राखेर क्यासिनो र त्यहाँका ग्राहकसम्म पैसा पठाउने गरेको देखिन्छ।’
तर, धेरैजसो पैसा भने हुण्डीमार्फत् बाहिरिएको शंका प्रहरीको छ।
सीमामा प्रहरीको आँखा छलेर लाखौं कारोबार नेपालका लागि नौलो भने हैन।
यी दुई व्यक्ति पक्राउ परेपछि महाशाखाले के कति रकम विदेशियो भन्नेबारे खोजी गरिरहेको छ। ‘अहिले अनुसन्धानकै क्रममा रहेकाले यति नै भनेर मैले भन्न सकिनँ,’ थापाले भने, ‘तर, ठूलो परिमाणमा कारोबार भएको हाम्रो शंका छ।’
उनका अनुसार क्यासिनो खेलाउने र खेल्ने दुवैले गैरकानुनी कार्य गरेको देखिएकाले कारबाही सबैलाई हुन्छ। ‘ग्राहक कम कारबाहीको भागिदार होलान्, तर कारबाही सबैलाई हुन्छ,’ थापाले भने, ‘यसबारे विस्तृत अनुसन्धानपछि कसलाई के कारबाही हुन्छ टुंगोमा पुग्छौं।’
थापाका अनुसार यो कसुरमा ठगीको एउटा, राजश्वको अर्को र विदेशी मुद्रा अलचलनमा पनि कारबाही आकर्षित हुन्छ। ‘हामी यी तिनै कारबाहीका प्रकरण उल्लेख गरेर सम्बन्धित निकायमा लेखेर पठाउँछौं,’ एसएसपी थापाले भने।
यो पनि हेर्नुहोस्
अनलाइनमा जुवा खेलाएर ५० लाख ठगी, भारत र श्रीलंकाको क्यासिनोका नेपाली ‘एजेन्ट’ पक्राउ
