चितवन राष्ट्रिय निकुञ्जमा रहेका दुई वटा अर्नाको बाघको आक्रमणबाट मृत्यु भएको छ। निकुञ्जको पदमपुर फाँटामा रहेको इन्क्लोजरमा रहेका २ वटा अर्ना सोमबार मृत अवस्थामा भेटिएको सूचना अधिकारी लोकेन्द्र अधिकारीले जानकारी दिए।
बाघको आक्रमणबाट मरेका दुई वटै अर्ना पोथी हुन्। आक्रमण गर्ने बाघलाई निकुञ्जको प्राविधिक टोलीले नियन्त्रणमा लिएर अर्को ईलाकामा लगेर छाडेको अधिकारीले बताए।
यहाँ कोसीटप्पु वन्यजन्तु आरक्षबाट १२ र सदर चिडियाखानाबाट ल्याइएका ३ वटा अर्ना राखिएको थियो। ती अर्नाबाट हालसम्म नवजात ६ (३ भाले, २ पोथी र हालै जन्म भएको १ लिंग पहिचान नभएको) वटा पाडापाडीको जन्म भएको छ।
यसअघि ६ वटाको बाढी, प्राकृतिक कारण र बाघको आक्रमणले मृत्यु भई सकेको छ। अब इन्क्लोजर भित्र स्थानान्तरण भएर आएका ७ र यहीँ जन्मिएका ६ वटा गरी १३ वटा अर्ना रहेका छन्।
यसैबीच, चितवन निकुञ्जले माडीको बाँदर झ्लाबाट सालक मारेर सुकुटी बनाई खाने र अखेटोपहार विक्री गर्ने २ जनालाई नियन्त्रणमा लिएको छ।
सूचना अधिकारी लोकेन्द्र अधिकारीकाअनुसार निकुञ्जको मध्यवर्ती क्षेत्रअन्तर्गत माडी नगरपालिका–९ बाँदरझुलाबाट दुई जनालाई पक्राउ गरिएको हो।
उनीहरुको साथबाट ३७५ ग्राम सालकको खपेटा, सालक मार्न प्रयोग भएको जाल र पासोसमेत बरामद गरिएको उनले बताए।
साथै निकुञ्जले सोहि स्थानबाट यसअघि चितुवा मारेर फरार रहेका पञ्चलाल प्रजालाई पनि पक्राउ गरिएको जनाएको छ।
