भारतीय कंग्रेसका पूर्वअध्यक्ष राहुल गान्धी सहभागी भारत जोडो यात्राको एक कार्यक्रमको भिडिओ अहिले भाइरल बनेको छ।
कार्यक्रममा राष्ट्रिय गान बजाउने बेलामा नेपालको राष्ट्रिय गान बजेपछि उक्त भिडिओ भाइरल बनेको हो। बिबिसी हिन्दीका अनुसार उक्त घटना बुधबारको हो।
त्यसमा गान्धीले माइकमार्फत राष्ट्रिय गान बजाउन भन्छन्, मन्चमा उपस्थित नेताहरू पनि उभिन्छन्।
तर प्राविधिक टोलीले भारतको राष्ट्रिय गान नबजाइ नेपालको बजाउँछन्। गीत बजेको केही सेकेन्ड बितेपछि मात्रै नेताहरूले नेपालको राष्ट्रिय गान बजेको थाहा पाउँछन्।
यो घटनाको भिडिओ भाइरल बनेपछि राहुल गान्धीको आलोचना भइरहेको छ।
आन्ध्रा प्रदेशका इकाइ सचिव रमेश नायडूले ट्विटरमार्फत गान्धीको आलोचना गरेका छन्।
उनले भनेका छन्, ‘डियर राहुल गान्धी, तपाईंको भारतीय कंग्रेसलाई हाम्रो देशको राष्ट्रिय गानसमेत थाहा छैन जस्तो छ।’
