विशेष अदालत काठमाडौंले अख्तियार दुरुपयोग अनुसन्धान आयोगका पूर्वआयुक्त राजनारायण पाठकलाई भ्रष्टाचारमा दोषी ठहर गर्दै तीन वर्ष तीन महिना कैद गर्ने फैसला सुनाएको छ।
विशेष अदालतका अध्यक्ष श्रीकान्त पौडेल, न्यायाधीशहरू यमुना भट्टराई र बलभद्र बास्तोलाको इजलासले बिहीबार पाठकलाई दोषी ठहर गर्दै उक्त कैद सजाय र ३९ लाख रूपैयाँ जरिवाना गर्ने फैसला सुनाएको हो।
अदालतले भ्रष्टाचार निवारण ऐनअनुसार तीन वर्ष र अख्तियारको बहालवाला आयुक्त भएकाले थप तीन महिना कैद गर्ने फैसला सुनाएको हो।
अदालतले नेपाल इञ्जिनियरिङ कलेजका लम्बोदर न्यौपानेलाई तीन वर्ष कैद र ३९ लाख रूपैयाँ जरिवाना गर्ने फैसला सुनाएको छ। पूर्वआयुक्त पाठकले नेपाल इञ्जिनियरिङ कलेजको जग्गा विवादमा ७० लाखभन्दा बढी घुस लिएको खुलासा भएपछि विवाद भएको थियो।
उक्त प्रकरणबाट बच्न पाठकले आयुक्त पदबाट राजीनामा दिएका थिए। अख्तियारले राजीनामा दिएपछि पाठकमाथि अनुसन्धान गरी घुस-रिसवतमा मुद्दा दायर गरेको थियो। अदालतले उनलाई बिहीबार फैसला सुनाउँदै दोषी ठहर गरेको हो।
