पूर्वप्रधानमन्त्री स्व टंकप्रसाद आचार्यको नवलपरासी (बर्दघाट सुस्ता पश्चिम) को सदरमुकाम परासीस्थित जन्मघरलाई संग्रहालय बनाइने भएको छ।
नेपाल प्रजा परिषद्का संस्थापक अध्यक्षसमेत रहेका उनको करिब एक सय वर्ष पुरानो जीर्ण घरलाई संग्रहालय बनाउन लागिएको हो।
लुम्बिनी प्रदेश सरकारको रु ५० लाखको लगानीमा संग्रहालय बनाउने योजना अघि बढाइएको हो।
‘घर निकै जीर्ण छ, जीर्णोद्वार गर्न असम्भव देखिन्छ। उस्तै नयाँ घर बनाएर संग्रहालयमा परिणत गर्ने योजना छ,’ टंकप्रसाद आचार्य स्मृति प्रतिष्ठानका सदस्य एवं लुम्बिनी प्रदेश सरकारका पूर्वआर्थिक मामिलामन्त्री वैजनाथ चौधरीले भने।
जीर्ण बनेको उक्त घरलाई २०७२ सालमा गएको भूकम्पले थप क्षति गरेपछि स्थानीयले संरक्षण गर्न माग गर्दै आएका थिए।
‘तीन दशकदेखि घरको संरक्षणको माग गरिँदै आएको थियो,’ चौधरीले भने।
स्व आचार्यको घर परासीको गौरव भएकाले संग्रहालयका रुपमा परिणत गर्ने योजना अघि बढाइएको उनको भनाइ छ।
प्रदेशसभा सदस्य वैजनाथ जैसवालले पुरातत्व विभागसँग समन्वय गरेर काम अगाडि बढाउनुपर्नेमा जोड दिए। उनले स्व आचार्यको घरको जीर्णोद्धार गर्न जरुरी भएको उल्लेख गर्दै आवश्यक परे थप बजेटका लागि प्रदेश सरकारसँग पहल गर्ने बताए।
आचार्यको जन्म विसं १९६९ मा भएको थियो। उनको २०४५ सालमा निधन भएको थियो। उन २०१२ सालमा मुलुकको प्रधानमन्त्री बनेको थियो।
