ललितपुरमा बुधबार मोटरसाइकल दुर्घटना हुँदा एक जनाको मृत्यु भएको छ।
ललितपुर महानगरपालिका–१३ कुसुन्तिको सडकमा बा ८७ प ५९०१ र बागमती प्रदेश ०२–००२ प ९३७६ नम्बरका मोटरसाइकल एकआपसमा ठक्कर खाँदा एक जनाको मृत्यु भएको हो।
उक्त दुर्घटनामा बाप्र ०२–००२ प ९३७६ नम्बरको मोटरसाइकल चालक धनुषा घर भई हाल ललितपुर महानगरपालिका–१७ ग्वार्को बस्ने २१ वर्षीय शिवम यादवको मृत्यु भएको प्रहरी प्रवक्ता पोषराज पोखरेलले जानकारी दिए।
दुर्घटनामा गम्भीर घाइते भएका उनको बिएन्डबी अस्पतालमा उपचारका क्रममा मृत्यु भएको हो।
दुर्घटनामा घाइते भएका बा ८७ प ५९०१ नम्बरको मोटरसाइकलमा सवार एक जनाको सोही अस्पतालमा उपचार भइरहेको छ। सोही मोटरसाइकलका चालकलाई प्रहरीले नियन्त्रणमा लिएको छ।
