दाङमा एक महिलाको कोठामा लागेको आगोका कारण निस्सासिएर मृत्यु भएको छ।
दंगीशरण गाउँपालिका वडा नं. ५ की ४० वर्षीया पार्वती घर्तीको कोठामा आगो लागेपछि निस्सासिएर मृत्यु भएको जिल्ला प्रहरी प्रमुख एसपी वीरबहादुर वलीले बताए।
घटनास्थल पुगेका इलाका प्रहरी कार्यालय तुलसीपुरका प्रहरी प्रवक्ता पर्वत केसीले एक कोठेजस्ता पाताले छाएको घरमा सानो भेन्टिलेसन मात्रै रहेको र सुत्ने सिरक डसना आगो लागेको अवस्थामा फेला परेको हुँदा त्यही धुवाँका कारण निस्सासिएर मृत्यु भएको पूर्व अनुमान गरिएको सेतोपाटीलाई बताए।
देवीगञ्जस्थित घर्तीको घर गाउँभन्दा झन्डै एक डेढ सय मिटर टाढा रहेको छ। उनी एक्लै बस्दै आएकी थिइन्।
‘स्थानीयलाई बुझ्दा मृतकले सधैं मापसे गर्ने र चुरोट पनि सेवन गर्ने गरेको भन्ने कुरा गरे,’ प्रहरी निरीक्षक केसीले भने, ‘मापसे गरेको समयमा चुरोट खाएर ठूटो फाल्दा सिरक वा डसनामा परेपछि त्यहीबाट आगो सल्किएर निस्सासिएर मृत्यु भएकोजस्तो देखिएको छ।’
तर, मृतकको शरीरमा भने कतै जलेको वा पोलेको घाउखत नदेखिएको उनले बताए।
कोठामा धुवाँ भरिएपछि भाग्ने प्रयास स्वरूप ढोका खोल्न प्रयास गरे पनि नसकेर ढोका नजिकै ढलेको अवस्थामा शव फेला परेको उनले जानकारी दिए।
‘कोठा भित्रबाट चुकुल लगाइएको अवस्थामा थियो र त्योभन्दा मुन्तिर फलामे रडले पनि ढोका थुनिएको थियो,’ केसीले भने, ‘कोठामा धुवाँ भरिएपछि भाग्ने प्रयास स्वरूप ढोका खोल्न प्रयास गरे पनि नसकेको हुँदा ढोकानजिकै लडेको जस्तो देखियो।’
बिहान स्थानीयले लामो समयसम्म पनि ढोका नखोलेको देखेपछि उठाउन भनेर ढोका ढकढक्याउन गएको र त्यसक्रममा कोठाको भेन्टिसेलनबाट धुवाँ उडिरहेको देखेपछि प्रहरीलाई खबर गरेका थिए।
प्रहरी निरीक्षक केसीका अनुसार प्रहरी बिहान घटनास्थल पुग्दा पनि धुवाँ उडिरहेको थियो।
घर्ती बस्ने घरमा बिजुली बत्ती छैन। उनले उज्यालोको लागि टुकी बाल्ने गरेको स्थानीयले बताएका छन्। सोही टुकी वा चुरोटको ठूटोबाट आगो सल्केको अनुमान रहेको उनले जानकारी दिए।
‘घटनाको प्रकृति हेर्दा टुकीभन्दा पनि चुरोट खाएपछि सावधानीपूर्वक ननिभाउँदा विस्तारामा सल्केको अनुमान गर्ने आधार देखिएका छन्,’ उनले भने, ‘थप कुरा पोष्टमर्टम रिपोर्टपछि भन्न मिल्ला।’
स्थानीयका अनुसार एक वर्ष पहिला पार्वती र उनका श्रीमानको सम्बन्ध विच्छेद भएको थियो।
पार्वतीका तीन छोरा काठमाडौंमै छन्। उनीहरू आएपछि मात्रै शवको पोष्टमर्टम हुने प्रहरीले जानकारी दिएको छ।
शव तुलसीपुरस्थित राप्ती प्रादेशिक अस्पतालमा राखिएको छ।
