काभ्रेमा धारिलो हतियार प्रहार गरी आमाको हत्या गरेको आरोपमा एक व्यक्ति पक्राउ परेका छन्।
पक्राउ पर्नेमा पनौती नगरपालिका–११ का ५२ वर्षीय विष्णुबन्ध थापा छन्।
जिल्ला प्रहरी कार्यालय काभ्रेका प्रवक्ता डिएसपी ढुण्डीराज न्यौपानेका अनुसार बुधबार बिहान ११ बजे विष्णुबन्धुले आफ्नी ९२ वर्षीया आमा कान्छीमाया थापाको हत्या गरेका हुन्।
उनले आक्रोशमा आएर आमाको हत्या गरेको प्रारम्भिक अनुसन्धानबाट खुलेको डिएसपी न्यौपानेले जानकारी दिए।
घटनाबारे स्थानीयले प्रहरीले खबर गरेका थिए। खबर पाएलगत्तै प्रहरी चौकी पनौतीबाट प्रहरीको टोली घटनास्थल पुगेको थियो।
‘बिहान छोराले आमालाई चिया बनाएर दिएका रहेछन्, खाना खानेबेला आवेगमा आएर खुर्पाले हानेछन्,’ प्रहरी चौकी पनौतीका प्रहरी सहायक निरीक्षक क्षेत्रबहादुर भण्डारीले सेतोपाटीसँग भने।
घटनाबारे थप अनुसन्धान भइरहेको प्रहरीले जानकारी दिएको छ।
