यसरी मनाइयो इद

नारायण महर्जन

काठमाडौं, असार १२

मुस्लिम समुदायहरुले आफ्नो महान पर्व इद हर्षोउल्लासका साथ मनाईरहेका छन ।

मुस्लिम समुदायले आपसी सुःख, शान्ति र समृद्धिको कामना गर्दै यो पर्व मनाउने गर्दछन । यसै अवसरमा काठमाडौंको घण्टाघरस्थित जामे मस्जिदमा पनि सोमबार विहान एक भव्य कार्यक्रम आयोजना गरियो । दीनदुःखी एवम् गरिवमा समेत खुशीयाली छाओस् भन्ने कामनाका साथ इद पर्व मनाउने गरिएको नेपाली जामे मस्जिदका सचिव मन्सुर हुसेनले बताए। अरबी पात्रो अनुसार दशौं महिनाको पहिलो दिन सोमबार मुस्लिम समुदायले विशेष नमाज पाठ गरी ठूलाबडाबाट आशिर्वाद लिने गर्दछन । यो पर्व ३ दिनसम्म विशेष रुपमा मनाउने गरिएको पनि सचिव हुसेनले बताए।

यस पर्वमा मुस्लिम धर्मावलम्बीहरुले एक वर्ष भित्रको वचत, साँढे ७ तोला सुन वा ५२ तोला चाँदी भए त्यस बराबर चालू बजारको मूल्य अनुसारको साँढे २ प्रतिशत नगद वा जिन्सी दान गर्नुपर्ने मुस्लिम धर्मग्रन्थ कुरानमा उल्लेख गरिएको छ । यसरी दान गरिएको नगद वा जिन्सी दीनदुःखी एवम् गरिवलाई दिने गरिन्छ । विशेष नमाज पढेपछि आफूभन्दा ठूला कहाँ गई आशिर्वाद लिने र मिठामिठा खानेकुरा खाने गरिन्छ । यो आशिर्वाद लिने क्रम तीन दिनसम्म चल्नेछ । यसै अवसरमा सरकारले सोमबार सार्वजनिक विदा समेत दिएको छ ।

उता, पर्साको विरगंजमा पनि मुस्लिम समुदायहरुले आफ्नो महान पर्व इर्द धुमधामका साथ मनाइरहेका छन् ।करिव एक महिनाको कडा ब्रतपछि आईतबार साँझ इदको चाँद हेरी सोमबार नजिकको मस्जिद र ईदगाहमा पुगेर अल्लाहसंग आर्शिवाद माग्दै रमजान महिना सम्पन्न गरेका छन् । ईस्लाम धर्मावलम्बीहरुले विगत एक महिनादेखि दैनिक साढे १७ घण्टा निराहार ब्रत बस्दै दिनभरीमा पाँच पटकसम्म नमाज पढेर रोजा बस्ने गर्छन । विरगंजमा करिव २५ हजार स्थानीय मुस्लिम समुदायले बीरगंजमा रहेका मस्जिदहरु लाठ गल्ली, छपकैया, मुर्ली, नयकाटोला, गण्डक, नगवा, लगायतका करिव २० वटा मस्जिदमा पुगी नमाज पढी दुवा मागिसकेपछि एक आपसलाई अंगालो हालेर शुभकामना आदानप्रदान गर्छन् ।

हेर्नुहोस् तस्बिरमा इद