कुलो थुनिएर गएको पहिराले घर पुरिँदा आमा र छोराछोरी गुमाएका म्याङ्लुङ नगरपालिका–५, आम्दिमका सोमकुमार सोदेम्बाको परिवारलाई शुक्रबार राहत प्रदान गरिएको छ ।
सोदेम्बाको परिवारलाई जिल्ला दैवीप्रकोप उद्धार समितिले तीन लाख ३० हजार र समाजसेवी राधिका पोखरेलले २० हजार राहतस्वरुप प्रदान गरेका हुन् । सदरमुकाम म्याङ्लुङमा पोखरेलले पहिरोपीडित परिवारलाई पठाएको सहयोग रकम २० हजार प्रजिअ वेदनिधि खनालले पीडित सोदेम्बाको परिवारलाई हस्तान्तरण गरे।
प्रजिअ खनालले उद्धार समितिले पीडित परिवारलाई राहत, क्षतिपूर्ति र काजकिरिया खर्चबापत एकमुष्ट रकम उपलब्ध गराइएको बताए ।
गत असार १७ गते घरमाथिको कुलो थुनिएर पहिरो जाँदा सोदेम्बाको घर पुरिएको थियो । पहिराले सोदेम्बाका आमा ५० वर्षीया कुमारी, छोरी १२ वर्षीया प्रीति र छोरा नौवर्षीय प्रेमको ज्यान गएको थियो ।
घर पुरिँदा घाइते भएका ३६ वर्षीय सोदेम्बा उपचाररत छन् । मंगलबार मात्रै उनकी छोरी प्रियाको हातको शल्यक्रिया भएको छ । उनको धरानस्थित बिपी कोइराला स्वास्थ्य विज्ञान प्रतिष्ठानमा उपचार भइरहेको छ ।
घरसहित परिवारका सदस्य नै गुमाएका सोदेम्बाको परिवार अर्थ अभावले पिल्सिरहेको छ । उनको परिवारको पीडा शान्त पार्न आफूले सहयोग गरेको जिल्लाकै सोल्मा घर भई हाल अष्ट्रेलियामा कार्यरत पोखरेलले बताइन्। पीडित परिवारले भने सरकारबाट तर्फबाट आफूले पाउने राहतसमेत पाउन ढिलाइ भएकामा गुनासो गरेको छ । परिवारका खातामा राहत रकम जम्मा भइसके पनि झिक्न नपाएको सोदेम्बाले गुनासो गरे। रासस
