रात्याम्मे भएर तीजमा छमछमी! (तस्बिरहरू)

अनिश रेग्मी

काठमाडौं, भदौ ८

आज हरितालिका पर्व अर्थात् तीज । हिन्दु नारीहरुले हर्ष उल्लासका साथ मनाईरहेका छन्।

तीजको अवसरमा काठमाडौंको पशुपतिनाथ सहितका शिवमन्दिरहरुमा श्रद्धालु महिलाहरुको ठूलो भीड लागेको छ । पूजाआजाका लागि लाइन बस्ने तथा पूजा सकिएपछि नाचगान गर्ने महिलाको भीडका कारण अधिकांश शिव मन्दिर पूरै झिलिमिली बनेको छ। पशुपति क्षेत्र विकासकोषले यसपटक विशेष पुजा र टिकटको व्यवस्था हटाएकाले दर्शन गर्न सजिलो भएको व्यवस्थापन समितिले जनाएको छ । पशुपति क्षेत्र विकास कोषले भक्तजनको सुरक्षा र आपतकालिन स्वास्थ्य सेवाको सम्पुर्ण व्यवस्था मिलाईएको जनाएको छ ।

यस्तै हनुमानढोकास्थित शिव मन्दिरमा पनि उस्तै भीड देखिन्छ।

राजधानी बाहिरका जिल्लाहरुमा पनि स्थानीय शिव मन्दिरहरुमा श्रद्धालु महिलाहरुको ठुलो भीड लागेको छ । हिन्दु नारीहरुले आज चुरा, पोते तथा गहना लगाई रातो पहिरनमा सजिएर नजिकैका शिव मन्दिरमा गई पूजाआजा तथा नाचगान गरी तीज मनाईरहेका छन् ।

परापूर्वकालमा हिमालयकी पुत्री पार्वतीले कठोर व्रत गरी आफ्नो कामना अनुसार महादेव पति पाएको धार्मिक विश्वासअनुसार तीज मनाउन थालिएको हो । विवाहित महिलाहरु पतिको दीघार्यु तथा अविवाहितले असल श्रीमानको अपेक्षा सहित निराहर ब्रत बस्ने चलन छ । आजको दिन भगवान शिवको दर्शन गरी पति तथा परिवारजनको स्वास्थ्य र दीर्घायुको कामना गरेमा फल पाईन्छ भन्ने जनविश्वास रही आएको छ । मन्दिरको दर्शन गरेर फर्किएका महिलाहरु समूह समुहमा बाँडिएर मन्दिर आसपासको क्षेत्रमा नाचगानमा रमाएका छन् । यस बर्षमा पारिवारीक पीडा, मुलुकको राजनीति तथा समसामयिक विषयलाई गीती भाकामा गाउदै महिलाहरुले रमाईलो गर्ने गर्दछन् ।

हेर्नुहोस् तस्बिरमा