मुस्लिम समुदायको महानपर्व ईद उल अजहा ‘बक्रईद’ कै दिन अर्थात भदौ १७ गतेको लागि तय गरिएको स्नातक तहको परीक्षा त्रिभूवन विश्वविद्यालयले सारेकोमा मुस्लिम विद्यार्थीहरूले खुसी प्रकट गरेका छन् ।
राजधानीमा मंगलबार मुस्लिम विद्यार्थी संघर्ष समितिले पत्रकार सम्मेलन गरेर त्रिविले बक्रईदकै दिनमा राखेको परीक्षालाई अन्ततः भदौ ३१ गते सार्ने निर्णय गरेकोमा त्रिविलाई धन्यवाद दिएको छ ।
राष्ट्रिय मुस्लिम संघर्ष गठबन्धनका प्रवक्ता मुहम्मद शहिद अलीले त्रिविले परीक्षाको मिति सारेकोमा धन्यवाद दिँदै भने,‘ हाम्रो आन्दोलनपछि त्रिविले परीक्षा सारेको छ, यो सकारात्मक कुरा हो ।’
उनले परीक्षा सार्दैमा मुस्लिम समूदायले संवैधानिक तवरबाट पाउनुपर्ने अधिकार पाएको नठहरिने भएकोले यसको स्थायी समाधान खोज्नु पर्ने धारणा राख्दै भने,‘ यो स्थायी समाधान होइन, म राज्यलाई एउटा प्रश्न गर्न चाहान्छु, हाम्रो समुदायलाई सधैँ सडकमा ओर्लिन किन बाध्य पारिन्छ ? गणतान्त्रिक मुलुकमा हामीले हाम्रा संवैधानिक अधिकारलाई व्यवहार त उपभोग गर्नको लागि किन टायर बाल्नुपर्छ ? हामीले चाहेको मुलुक यो होइन ।’
उनले अघि थपे,‘हामी राष्ट्रवादी समुदाय हौँ, हाम्रो मुलुक विश्वको शक्तिशाली देशको रूपमा उदाएको देख्न चाहन्छौँ, हामी मुलुकको उन्नति र प्रगतिको लागि आफ्नो तर्फबाट कर्तव्य निर्वाह गर्न तयार छौँ, राष्ट्रका समस्याप्रति हाम्रो गहिरो चिन्ता छ, हाम्रो अधिकारको लागि आगामी दिनहरूमा आन्दोलन गर्न नपरोस, सरकारले दुर्गामी नजरले सबै नागरिकलाई सामान व्यवहार गरोस्, सबैका अधिकारलाई सुनिश्चित गर्नको लागि स्थायी समधान खोज्न सरकारलाई हाम्रो आग्रह छ ।’
मुस्लिम विद्यार्थी संघर्ष समितिका संयोजक रहिम मुल्ला मियाँले त्रिविले परिक्षा सारेर आफ्नो समुदायको हितमा काम गरेको बताए ।
निर्वाचन आयोगले रमजानको समयमा दोस्रो चरणको निर्वाचनको मिति घोषणा गरेपछि चौतर्फी विरोध भएको थियो । मुस्लिम समुदायले मिति सार्नको लागि सरकारलाई बाध्य बनाएको थियो ।
त्यस्तै, इस्लामी संघका महासचिव अबुल कलाम मियाँले नेपाली मुस्लिम समुदाय लोकतन्त्रको अनुभूति गर्न नपाएको गुनासो गरे।
