नेपाल प्रहरीका डिआइजी नवराज सिलवालले प्रहरी सेवाबाट आजैका मितिबाट अलग भएको घोषणा गरेका छन् ।
आज साँझ बिज्ञप्ति निकालेर उनले प्रहरी सेवाबाट अलग भएको घोषणा गरेका हुन् । सरकारले वरियताक्रम अनुसार आइजिपी नियुक्त नगरेको भन्दै सर्वोच्च अदालतमा दायर गरेको रिट खारेज भएको केही घन्टापछि उनले राजीनामा घोषणा गरेका हुन् ।
२ पेज लामो प्रेस विज्ञप्तिमा उनले ७ महिनो कानुनी लडाइँ सकिएको बताएका छन् । इमान्दार हुदाँ पनि अन्यायमा पार्ने जोखिम प्रहरी संगठनमा रहेको उनले बताएका छन् ।
आफूलाई पीडित पुरस्कृतको संज्ञा दिदैँ उनले आफूले भोगेको जस्तो नियति कसैले भोग्नु नपरोस भनेका छन् ।
प्रहरी सेवाबाट अलग भएपछि अन्यायमा परेकाहरुको एउटा शसक्त आवाज बन्ने प्रयास गर्ने उनले प्रतिबद्धता जनाएका छन् ।
वरियता क्रम मिचेर जयबहादुर चन्दलाई आइजिपी नियुक्त गरेपछि उनी अदालत गएका थिए। अदालतले चन्दलाई आइजिपी बनाउने सरकारी निर्णय खारेज गरेपछि प्रकाश अर्याल आइजिपी नियुक्त भएका थिए।
अर्याललाई आइजिपी बनाएको भन्दै सिलवाल फेरि अदालत गएका थिए। उनले २०७३ चैत ३० गते अदालतमा रिट दायर गरेका थिए।
उक्त रिट प्रधानन्यायाधीश गोपाल पराजुलीको नेतृत्वमा न्यायधीशहरु ओमप्रकाश मिश्र, केदारप्रसाद चालिसे, शारदाप्रसाद घिमिरे, मीरा खड्का, प्रकाशमान सिंह राउत र पुरुषोत्तम भण्डारी समेत गरी सात न्यायाधीश सम्मिलित बृहत पूर्ण इजलासले खारेज गरिदिएको छ।
डिआइजी सिलवाललाई सरकारले एआइजी बढुवाबाट समेत वञ्चित गरेको छ।
चार महिनाअघि बहालवाला डिआइजी उनलाई प्रहरीले किर्ते गरेको आरोपमा पक्राउसमेत गरेको थियो। राजीनामापछि नयाँ कामको थालनी गर्ने उनले बताएका छन्।
उनले निकालेको प्रेस विज्ञप्तिको पूर्ण पाठ
