तस्बिरमा हेरौं कुकुर तालिम स्कुलमा कुकुर तिहार

नारायण महर्जन

काठमाडौं, कात्तिक १

हिन्दुहरूको दोस्रो ठूलो चाड तिहारको दोस्रो दिन बुधबार कुकुर तिहार कुकुरको पूजा गरी मनाइएको छ।

हिन्दु परम्परा अनुसार कार्तिक कृष्ण चर्तुदशीका दिन भैरवको बहान कुकुरको पूजा गर्ने गरिन्छ। मानिसको निकट साथीको रूपमा मानिने कुकुर आज्ञाकारी र रक्षक भएकाले यसको पूजा गर्ने प्रचलन रहिआएको हो।

यसै अवसर पारेर नेपाल प्रहरीले महाराजगंजस्थित केन्द्रीय प्रहरी कुकुर तालिम स्कुलमा विशेष कार्यक्रम आयोजना गरी कुकुर पूजा गरेको छ।

नेपाल प्रहरीले अपराध नियन्त्रण तथा अनुसन्धानका लागि प्रयोग गरेका तालिम प्राप्त कुकुरहरूको पूजा गरेको हो । स्कुलकी प्रमुख प्रहरी उपरीक्षक देउती गुरुङले कुकुर तिहारको अवसर पारेर यस वर्ष पनि कुकुर तिहारमा विशेष कार्यक्रम आयोजना गरिएको जानकारी दिईन्।

कार्यक्रममा अनुसन्धानमा उत्कृष्ट भएका एउटा कुकुरलाई सम्मान पनि गरिएको थियो। केन्द्रीय प्रहरी तालिम स्कुलबाट तालिम प्राप्त कुकुरहरूलाई अपराध अनुसन्धानको कार्यमा परिचालन गर्ने गरिन्छ। स्कुलकी प्रमुख प्रहरी उपरीक्षक गुरुङले सबै प्रदेशहरूमा पनि कुकुरहरूलाई तालिम दिने व्यवस्था गर्न लागिएको जानकारी दिईन्।

नेपाल प्रहरीले अपराध अनुसन्धानका लागि कुकुरहरूलाई तालिम दिने गर्दछ ।