म्यानमारमा यहाँका अल्पसंख्यक मुस्लिम समुदाय रोहिंगा जातिविरुद्धमा जारी राजनीतिक हिंसाका कारण भागेर बंगलादेश पस्ने म्यान्मालीको संख्या प्रतिदिन बढ्दै गएको छ।
प्राप्त पछिल्लो समाचारअनुसार यसरी भागेर बंगलादेश पुगेका म्यान्माली शरणार्थीको संख्या ५ लाख ९० हजार छ। अहिले पनि म्यानमारको सीमा क्षेत्रबाट बंगलादेश छिर्ने क्रम जारी नै रहेको बताइएको छ।
यसरी बंगलादेश पुगेका म्यान्माली शरणार्थीमध्ये आधाभन्दा बढी बालबालिका रहेका बताइएको छ। शरणार्थी बालबालिकाको संख्या ३ लाख २० हजार छ।
संयुक्त राष्ट्रसंघका प्रवक्ता फराह हकले दिएको जानकारीअनुसार अहिले पनि म्यानमारको उत्तरी राखिन राज्यबाट भागेर बंगलादेश छिर्ने क्रम रोकिएको छैन। यी दुई देशको सीमा क्षेत्रमा रहेको नाफ नदी तरेर म्यान्मालीहरु बंगलादेश छिर्ने गरेका छन्।
केही दिनमात्र यता पनि करिब सात हजार म्यान्मालीहरु करिब चार दिनको यात्रापछि बंगलादेश आइपुगेका प्रवक्ता हकले जानकारी दिएका छन्। उनीहरुमध्ये अझै एक हजार जना म्यान्मारबाट बाटो लागेका तर बंगलादेश आउने क्रममा छन्।
बंगलादेशका शरणार्थी शिविरहरुमा उनीहरुको जीवन अत्यन्तै कष्टपूर्ण बन्दै गएको, धेरै ठूलो संख्याका शरणार्थी रहेकोले उनीहरुको खानपिन तथा अन्य कामका लागि पनि व्यवस्थापन गर्न अप्ठेरो भएको तथा दाता राष्ट्रहरु तथा संघसंस्थाहरुलाई पनि आग्रह गरिएको उनले बताए।
शरणार्थी शिविरहरुमा रहेका बालबालिकाको अवस्था प्रतिदिन नाजुक हुदै गएको छ। स्वस्थ खानेपानी तथा अन्य आधारभूत आवश्यकताको अभावमा उनीहरुको अवस्था नाजुक बन्दै गएको बताइएको छ।
उनीहरुमा पानीजन्य संक्रमण देखिएको, झाडापखाला र आउँका विरामीहरु प्रतिदिन बढिरहेको भन्दै स्वास्थ्य कार्यकर्ताहरुले बालबालिकामा हैजाको प्रकोप फैलिनसक्ने त्रास कायमै रहेको बताएका छन्।
गएको अक्टोबर २५ मा म्यानमरको उत्तरी राखिन राज्यमा बसोबास गरिरहेका रोहिंगा समुदायका मुस्लिमआबद्ध सशस्त्र समूहले सोही क्षेत्रका प्रहरी चौकीमा हमला गरेपछि त्यहाँको सेनाले उक्त समुदायमाथि नै आक्रमण थालेको थियो।
सोही कारण उनीहरु देश छोडेर भाग्न बाध्य भएका थिए।
