शनिबार राति ठमेलको मनाङ गल्लीमा गोली चलाउनेलाई प्रहरीले पक्राउ गरेको छ। काठमाडौं प्रहरी परिसरका प्रमुख एसएसपी रवीन्द्र धानुकका अनुसार गोली हानेको अभियोगमा चार जना प्रक्राउ परेका छन्। पक्राउ पर्नेमा असुन गुरूङ, नवराज लामिछाने, सुरेन्द्र शाही र सविना क्षेत्री छन्।
शनिबार राति साढे २ बजेतिर ठमेलको मनाङ गल्लीमा गोली चलेको थियो। गोली लागेर गोरखा लाप्राकका कल्याण गुरुङ घाइते भएका छन्।
प्रहरी अनुसन्धानले कल्याणलाई असुनले गोली हानेको देखाएको छ। एसएसपी धानुकका अनुसार कल्याण र सबिना शनिबार राति ठमेलको सिएनआई डिस्कोमा सँगै थिए।
https://www.youtube.com/watch?v=E4acw2hzgWE
राति २ बजेतिर उनीहरु डिस्कोबाट निस्के। डिस्कोबाट निस्केर हिँडेकी सविनालाई बा ५६ प ६९५७ नम्बरको स्कुटर चलाइरहेका कल्याणले पछ्याए। पछिसम्म पनि कल्याणले पिछा नछोडेपछि सबिना फोन गरेर असुनलाई बोलाइन्। असुन कार ल्याएर आए, सबिना कारमा बसिन् तर कल्याणले पिछा छोडेनन्। उनले ओभरटेक गरेर कारलाई रोक्न खोजे। यतिबेला साढे रातको २ बजिसकेको थियो।
‘त्यसपछि असुनले आफूसँग भएको पेस्तोल निकालेर कल्याणको घुँडामुनि हाने,’ एसएसपी धानुकले भने, ‘उनको गोलीगाँठोमा एक राउन्ड गोली लागेको छ। ज्यान मार्ने उद्देश्यले नभई तर्साउन गोली चलाएको देखिन्छ।’
प्रहरीले पक्राउ परेकामाथि थप अनुसन्धान भइरहेको जनाएको छ। गोली लागी घाइते भएका कल्याणको शिक्षण अस्पताल महाराजगन्जमा उपचार भइरहेको छ।
https://www.youtube.com/watch?v=Aov5-Wklrpw
