आइसीसी विश्व क्रिकेट लिग डिभिजन २ को पहिलो खेलमा नामिबियाले दिएको १३९ रनको लक्ष्य पछ्याएको नेपालले कमजोर प्रदर्शन गरेको छ।
सुरूमै विकेट गुमाएको नेपालले पावर प्लेमा अर्थात १० ओभरको खेल समाप्तीमा १ विकेट गुमाएर २३ रन बनाउँदै खेलिरहेको छ।
नेपालका लागि कप्तान पारस खड्काले २७ बलमा १४ रन बनाएका छन् भने उपकप्तान ज्ञानेन्द्र मल्लले ३२ बलमा ७ रन बनाएका छन्।
नेपालले अहिलेसम्म एउटा मात्र बाउन्ड्री प्रहार गरेको छ।
यसअघि नामिबियाले १० ओभरमा २ विकेट गुमाएर ६६ रन बनाएको थियो।
दोस्रो ओभरको पहिलो बलमा ओपनर दिलिप नाथ आउट भए। उनले सामना गरेको पहिलो बलमै आउट भएका हुन्।
अहिले क्रिजमा कप्तान पारस खड्का र उपकप्तान ज्ञानेन्द्र मल्ल छन्।
यसअघि नामिबियाको विन्डहकस्थित एफिज पार्क मैदानमा नेपालले टस जितेर नामिबियालाई पहिले ब्याटिङको निम्तो दिएको थियो। निर्धारित ५० ओभरको खेलमा नामिबियाले ३४.२ ओभरमा सबै विकेट गुमाउँदै १३८ रन बनाएको थियो।
नामिबियालाई सस्तैमा समेट्ने क्रममा नेपालका सन्दिप लामिछानेले सर्वाधिक ४ विकेट लिए भने सोमपाल कामीले ३ विकेट लिएका थिए।
सरद भेसवाकर, पारस खड्का र बसन्त रेग्मीले समान १-१ विकेट लिएका थिए।
