चितवनको रामपुरमा निर्माणाधिन गौतम बुद्ध अन्तर्राष्ट्रिय क्रिकेट रंगशाला निर्माणलाई सहयोग जुटाउन आज भएको कलाकार र खेलाडीबीचको क्रिकेट प्रतियोगिताको फाइनलमा टिम सुन्तली ‘ए’ दुई रनले विजयी भएको छ ।
सुरुमा बलिङ गरेको टिम सुन्तली ‘ए’ ले ९७ रनको टार्गेट दिएकोमा टिम धुर्मुस ‘ए’ ले सबै १० ओभरको समाप्तीमा ४ विकेटको क्षतिमा ९५ रन बनाएको थियो ।
विजयी टिममा कुञ्जना घिमिरे टिम क्याप्टेन रहेकी थिइन् भने टिम र्धुमुस ‘ए’ को कप्तानी सिताराम कट्टेलले गरेका थिए । टिम सुन्तलीका अन्य खेलाडीहरुमा विनोद भण्डारी, सिता राना मगर, इन्दु वर्मा, विवेक सिंह ठकुरी, प्रकाश सपुत, अनिल गुरुङ, बचन कार्की, रामकृष्ण ढकाल, अनुपविक्रम साही रहेका थिए । त्यस्तै प्रतियोगितामा सह विजेता टिम धुर्मुस ‘ए’ का खेलाडीहरुमा ज्ञानेन्द्र मल्ल, अनिल शाह, सुनिल थापा, प्रमोद खरेल, दयाहाङ राई, रवि ओड, नरेश भट्टराई, सुरक्षा पन्त, सदिना श्रेष्ठ र बेनिसा हमाल रहेका थिए ।
चारवटा टिम सहभागी प्रतियोगितामा भएका दुई खेलमा पहिलो खेलमा टिम धुर्मुस ‘ए’ र टिम सुन्तली ‘ए’ विजयी भएका थिए । दुई टिमबीच दोस्रो चरणमा फाइनल खेल भएको थियो । पहिलो खेलमा टिम धुर्मुस ‘ए’ ६ रनले विजयी भएको थियो । टिम ‘ए’ ले ७० रनको टार्गेट दिँदा ‘बी’ ले ६३ रन मात्र ल्याएको थियो । त्यसैगरी दोस्रो खेलमा टिम सुन्तली ‘ए’ र ‘बी’ बीच भएको खेलमा सात विकेटले टिम सुन्तली‘ए’ विजी भएको थियो । जसले ५७ को टारगेट दिँदा‘बी’ ५० रन मात्र ल्याएको थियो ।
भरतपुर महानगरपालिकाकी प्रमुख रेणु दाहालले उक्त प्रतियोगिताको उद्घाटन गरिन्। उद्घाटनका क्रममा कलाकार तथा सामाजिक अभियन्ता सीताराम कट्टेल 'धुर्मुस'ले बलिङ गर्दा रेणुले ब्याटिङ गरेकी थिइन्।
प्रतियोगिताको उद्घाटन क्रममा धुर्मुस, कुञ्जना घिमिरे 'सुन्तली' वरिष्ठ कलाकार सुनिल थापालगायत सहभागी भए।
कार्यक्रममा भरतपुर महानगरका प्रमुख दाहालले महानगरले आफ्नो गौरवको आयोजना समयमै पुरा गर्न हरतरहको सहयोग गरिरहेको बताइन्। उनले गौतम बुद्ध अन्तर्राष्ट्रिय क्रिकेट रंगशाला बनाउन देश-विदेशबाट निरन्तर सहयोगको अपेक्षा पनि गरेकी छन्।
उनले यस गौतमबुद्ध अन्तर्राष्ट्रिय क्रिकेट रंगशाला सम्पन्न गर्न देश तथा विदेशमा रहेका नेपाली दाजुभाइ दिदीबहिनीलाई सहयोग गर्न आग्रह गरिन् ।
